Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 90 Hüküm no: 67 Orijinal metin no: [17a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dolayoba köyünden Mustafa Beşe'nin Pendik köyündeki bağını Mehmed Beşe'ye satması Medîne-i Üsküdar muzâfâtından Adalar nâhiyesine tâbi‘ Dolayoba karyesi sükkânından Mustafa Beşe b. Mahmud nâm kimesne meclis-i şer‘-i hatîr-i lâzımü’t-tevkīrde işbu hâfizü hâze’l-kitâb karye-i Yakacık sükkânından Mehmed Beşe b. Hasan mahzarında ikrâr-ı tâm ve takrîr-i kelâm edip karye-i Pendik hudûdunda vâki‘ bir tarafdan Andon zimmî bağı ve bir tarafdan Yanaki zimmî tarlası ve bir tarafdan Mustafa Çelebi tarlası ve bir tarafdan tarîk-i âm ile mahdûd tahmînen yedi bin çubuk hora bağımı bi-cümleti’t-tevâbi‘ ve’l-levâhık mezbûr Mehmed Beşe’ye tarafeynden îcâb ve kabûlü [hâvî] bey‘-i bâtt-ı kat‘î ile mezbûr Mehmed Beşe’ye yüz kırk sekiz guruşa bey‘ ve teslîm ve kabz-ı semen eylediğimde ol dahi minvâl-i muharrer üzere iştirâ ve tesellüm ve kabz ü kabûl eyledikden sonra semeni olan meblağ-ı merkūm yüz kırk sekiz guruşu mezbûr Mehmed Beşe yedinden bi’t-tamâm ahz u kabz eyledim, ba‘de’l-yevm bağ-ı mahdûd-ı mezkûr mezbûr Mehmed Beşe’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’s-sâdis min-Rebî‘ülâhire sene 1121 Şuhûdü’l-hâl: el-Hâc Süleyman, Ali Beşe sâkin-i karye-i Yakacık, Ahmed Çelebi b. Piri sâkin-i Üsküdar, Mehmed Beşe sâkin-i karye-i Aydın, Nuh Bali sâkin-i karye-i Yakacık, İbrahim Beşe b. Receb ve gayruhum mine’l-huzzâr.