Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 92 Hüküm no: 73 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuzla köyünden Franko'nun iki adet evini oğulları Manolaki ve Palaş'a satması Medîne-i Üsküdar muzâfâtından Adalar nâhiyesine tâbi‘ Tuzla nâm karye sâkinlerinden Franko v. Mihailo nâm zimmî meclis-i şer‘-i şerîf-i lâzımü’t-tevkīrde işbu bâ‘isü’s-sifr sulbî oğlu Manolaki ve [Metinde yanlışlıkla veled yazılmıştır] Palaş nâm zimmîler mahzarında bi’t-tav‘i’s-sâf ikrâr ve takrîr-i kelâm edip zikri âtî akdin sudûruna değin silk-i mülkümde münselik olup karye-i mezbûrede vâki‘ bir tarafdan Neyoz menzil[i] ve bir tarafdan Andeliki menzil[i] ve iki tarafdan tarîk-i âm ile mahdûd tahtânî iki bâb oda ve ahırı müştemil menzilimi ve yine karye-i mezbûrda vâki‘ bir tarafdan Mehmed Ağa mahzeni ve bir tarafdan Baderni menzil[i] ve iki tarafdan tarîk-i âm ile mahdûd iki bâb tahtânî oda ve bir ahırı müştemil mülk menzilimi cemî‘ tevâbi‘ ve levâhıkı ile doksan [beş] esedî guruşa mesfûrân Manolaki ve Palaş nâm zimmîlere îcâb [ve] kabûl[ü] hâvî bey‘-i bâtt-ı sahîh-i şer‘î ile bey‘ ve teslîm, onlar dahi vech-i muharrer üzere iştirâ ve kabz eylediklerinden sonra semeni olan meblağ-ı mezbûr doksan beş esedî guruşu mesfûrân Manolaki ve Palaş nâm zimmîler yedlerinden bi’t-tamâm ahz u kabz eyledim, fîmâ-ba‘d menzilân-ı mahdûdân mesfûrân Manolaki ve Palaş nâm zimmîlerindir, benim aslâ alâka ve medhalim kalmayıp mesfûrânın mülk-i müşterâlarıdır, keyfe mâ yeşâ ve yahtâr mutasarrıflar olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’s-sâlis min-Recebi’l-ferd li-sene ihdâ ve ışrîn ve mi'e ve elf. Şuhûdü’l-hâl: Ahmed Ağa b. Mustafa, İbrahim Ağa b. Mustafa, İsmail Beşe b. İbrahim, Mehmed Çelebi b. Mehmed, Mehmed Beşe b. el-Hâc Mehmed, Mustafa Beşe b. Mehmed, Yanaki v. Andon, Mihailo v. Dimitri.