Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 95 Hüküm no: 77 Orijinal metin no: [18b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakacık köyü bostanında öldürülen Hasan'ın katillerinin bulunması talebi Bostancıbaşı ağa ma‘rifetiyle mahâllinde şer‘le mürâfa‘a ve tefahhus ve icrâ-yı hak ve i‘lâm olunmak buyuruldu. Devletlü ve sa‘âdetlü sultanım hazretleri sağ olsun. Arzuhâl-i kulları oldur ki, vârisi olduğum ammim oğlu Hasan nâm kimesneyi bundan akdem Adalar nâhiyesine tâbi‘ Yakacık nâm karye bostanında karye-i mezbûrede sâkin Hüseyin ve oğlu Ahmed ve yine karyede sâkin refîkleriyle katl etmeleriyle ve mâlını dahi alıp ahâlî-i karye dahi maktûlleri himâyeten meyyitini saklayıp bilâ-keşf defn eyleyip maktûlleri cümlesi bilir iken ele vermeyip küllî gadr etmeleriyle merâhim-i aliyyelerinden niyâz olunur ki hâlime merhamet olunup mûrisimi katl eden kimesneleri izn-i şer‘le karye-i mezbûrede teftîş ve tefahhus ve bulunması bâbında izzetlü bostancıbaşı ağa hazretlerine tarafından haseki ta‘yîn ve mezbûrlar ahzolundukda mahâllinde Adalar nâibi efendi huzûrunda mürâfa‘a-i şer‘ olunup sıhhati üzere huzûr-ı âlîlerine i‘lâm olunması bâbında fermân sultanımındır. Bende: Vâris Ebubekir. [19a] Vukifet hâze’s-sicillü’l-mahfûz ve ene’l-fakīru ileyhü azze şânühû İsmail el-müvellâ-hilâfeten be-nâhiye-i Adalar min-muzâfâtı medîneti Üsküdar el-mahrûse -gufira lehû- fi’l-yevmi’s-sânî ve’l-ışrîn min-Cemâziyelâhire li-sene ışrîn ve mi'e ve elf.