Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 94 Hüküm no: 76 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal kasabasından Avanis'in bağını Danyel'e satması Medîne-i Üsküdar muzâfâtından Adalar nâhiyesine tâbi‘ Kartal nâm kasaba sâkinler[in]den Avanis v. Yason nâm Ermeni tarafında[n] husûs-ı âti’l-beyânı ikrâr ve bey‘ ve tasdîka vekîl olduğu Balita v. Lertic ve Avadik v. Kirkor nâm zimmîler şehâdetleriyle sâbit ve sübût-ı vekâletine hükm-i şer‘î lâhık olan Gaspar v. Karabet nâm Ermeni meclis-i şer‘-i hatîr-i lâzımü’t-tevkīrde işbu bâ‘isü’s-sifr Danyel v. Vartalamoz nâm zimmî mahzarında bi’l-vekâle ikrâr-ı tâm ve takrîr-i kelâm edip müvekkil-i mesfûrun yedinde silk-i mülkünde münselik olup kasaba-i mezbûre sınırı dâhilinde Rahman toprağında vâki‘ bir tarafı Mustafa nâm kimesne yetîmi bağı ve bir tarafdan Dimo oğulları bağı ve bir tarafdan el-Hâc Mehmed bağı ve bir tarafdan tarîk-i âm ile mahdûd ve mümtâz tahmînen sekiz bin çubuk yerli? bağımı Deli İbrahim münâdî yediyle sûk-ı sultânîde ve mecma‘-ı nâs olan yerlerde on gün mikdârı nidâ ve mezâd ve inkıtâ‘i’r-rağbe semen-i misli olan yüz yirmi guruşa eşcâr-ı müsmire ve gayr-ı müsmireyi müştemil bağı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile bi-safkatin vâhidetin meblağ-ı mezbûr yüz yirmi guruş[a] müşteri-i mesfûr Danyel zimmîye bey‘ ve teslîm ol dahi ber-vech-i muharrer iştirâ ve tesellüm ve kabz [u] kabûl eyledikden sonra semeni olan meblağ-ı mezbûr yüz yirmi guruşu Danyel yedinden müvekkilim mesfûrdan tamâmen alıp ahz u kabz eyledi, ba‘de’l-yevm zikri sebkat eden bağ-ı mahdûd-ı mezbûrede müvekkilim mesfûrun alâkası ve medhali kalmayıp müşteri-i mesfûrun mülk-i müşterâsı ve hakk-ı sırfıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî min-şehri Ramazani’l-mübârek li-sene ihdâ ve ışrîn ve mi'e ve elf. Şuhûdü’l-hâl: Hüseyin Beşe b. Mehmed, Berber İbrahim b. Mehmed, Hasan Beşe b. İsmail sâkin-i Soğanlık, İbrahim b. Receb, Arab el-Hâc Mehmed b. Hasan, Murad b. Abdülkerim, İbrahim b. Halil sâkin-i Yakacık, Alova v. Dini, Yanaki v. Lorika, Balita v. Lernic, Varita v. Kuzi ve gayruhum.