Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 100 Hüküm no: 86 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Martanite'nin küçük çocukları Tomas ve Avanos'a kardeşleri Magderos'un vasi tayini Medîne-i Üsküdar muzâfâtından Adalar nâhiyesine tâbi‘ Kartal nâm karye sâkinelerinden bundan akdem hâlike olan Martanite bt. Vartan nâm Ermeniyenin sulbî sagīr oğulları Tomas ve Avanos nâm sagīrânın tesviye-i umûruna bir vasî nasbı lâbüd olmağın vesâyet-i mezbûreye her vechile ehil ve uhdesinden gelmeğe kādir olduğunu sikāt-ı sahîhatü’l-kelimât ihbârı ile lede’ş-şer‘i’l-mutahhar zâhir olan hâlike-i mesfûrenin sulbî kebîr oğlu işbu râfi‘u’s-sifr Magderos v. Bogos nâm zimmîyi hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri minvâl-i muharrer üzere vasî nasb ü ta‘yîn eyledikde ol dahi vesâyet-i mezbûreyi ba‘de’l-kabûl hidemât-ı lâzımesini edâya müte‘ahhid olmağın mâ-hüve’l-vâki‘ bi’t-taleb ketb olundu. Fi’l-yevmi’l-hâmis [min]-Cemâziyelâhire li-sene ışrîn ve mi'e ve elf. Şuhûdü’l-hâl: el-Hâc Mehmed [b.] Veli, el-Hâc Ali b. Mehmed, el-Hâc Mehmed b. Yakub, Mehmed Efendi [b.] Mustafa, İsmail Beşe b. Yakub.