Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 578 Hüküm no: 710 Orijinal metin no: [124b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni bt. Yusuf’un kendisi ve müvekkilleri adına menzilini Rukiye bt. İbrahim Paşa’ya satması Husûs-ı âti’z-zikrin mahallinde ketb [ü] tahrîri için savb-ı şer‘den bi’t-taleb irsâl olunan Ebûbekir Efendi b. el-Hâc Abdülkerim mahmiye-i İstanbul’da Kâtib Şemseddin mahallesi sükkânından iken bundan akdem vefât eden Abdülkādir Ağa b. Mehmed’in zikri âtî menzile varıp zeyl-i kitâbda muharrerü’l-esâmî müslimîn huzûrlarında akd-i meclis-i şer‘-i şerîf eyledikde müteveffâ-yı mezbûr Abdülkādir Ağa’nın verâseti zevce-i metrûkesi Ümmühâni Hâtun bt. Yusuf ile sulbî kebîr oğlu olup Beç seferinde [esîr olan] Sâlih Ağa’ya ve âhar oğlu İbrahim Ağa’ya ve sulbiye kebîre kızı Emetullah ve Afîfe’ye münhasıra olup kable’l-kısme mezbûre Afîfe dahi fevt olup verâseti vâlidesi mezbûre Ümmühâni Hâtun ile karındaşları mezbûrûn Sâlih Ağa ve İbrahim Ağa ve Emetullah’a münhasıra ve tashîh-i mes’eleleri bi tarîki’l-münâsahati’ş-şer‘iyye iki yüz seksen sekiz sehimden olup sihâm-ı mezbûreden (…) üç sehimi mezbûre Emetullah Hâtun’a isâbet eylediği şer‘an zâhir ve müte‘ayyin oldukdan sonra kendi tarafından asîl ve mezbûr Sâlih Ağa sefer-i mezbûre gider oldukda vekâlet-i mutlaka ile vekîl etmekle tarafından ber vech-i muharrer vekîl olduğu mahrûse-i Galata müzâfâtından İstinye nâhiyesine tâbi‘ Boğazkesen kal‘asında Arpa emîni mahallesi imâmı olup kendi zâtını ârifân Mehmed Efendi b. Ali ve müezzin el-Hâc Osman b. Mehmed şehâdetleriyle şer‘an sâbit olan mezbûre Ümmühâni Hâtun asâleten ve vekâleten ve yine kendi tarafından asîl ve kız karındaşı mezbûre Emetullah Hâtun tarafından husûs-ı âti’z-zikre vekîl olduğu zât-ı mezbûreyi dahi ma‘rifet-i şer‘iyye ile ârifân mezbûr el-Hâc Osman b. Mehmed ve Mehmed Çelebi b. Abdurrahman şehâdetleriyle şer‘an sâbit olan merkūm İbrahim Ağa kezâlik asâleten ve vekâleten meclis-i ma‘kūd-ı mezbûrda, umdetü’l-muhadderât zübdetü’l-muvakkarât sâhibetü hâze’l-kitâb Rukiye Hanım bt. el-merhûm İbrahim Paşa’nın üveyi oğlu ve tarafından husûs-ı âti’z-zikri tasdîke sâbitü’l-vekâle vekîl olan umdetü’l-emâcid ve’l-ekârim Mustafa Bey b. el-vezîr Abdi Paşa mahzarında her biri ikrâr-ı tâm ve takrîr-i kelâm edip mûrisimiz müteveffâ-yı mezbûr Abdülkādir Ağa’nın ile’l-vefât ebniyesi silk-i mülkümde münselik ve arsası merhûm Mi‘mâr Sinan Ağa vakfından senede yedi yüz yirmi akçe mukāta‘a-i kadîme ile taht-ı tasarrufunda olup zikr olunan Kâtib Şemseddin mahallesinde vâki‘ bir tarafdan vakf-ı Sultan Süleyman Hân medresesi ve iki tarafdan vakf-ı mezbûrdan olan menzil ve dekâkîn ve bir tarafdan tarîk-i âm ile mahdûd dâhiliyyesi beş bâb fevkānî oda ve iki sofa ve bir kiler ve bir kenîf ve bir tahtânî kiler ve bir kebîr matbah ve bir hamam ve bir samanhâne ve bir tahtapûş ve tahtânî odayı müştemil menzilin ebniyesini bi cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile asâleten ve vekâleten müvekkile-i mûmâ-ileyhâ Rukiye Hanım’a dört bin esedî guruşa bey‘ ve temlîk ve arsasını bâ ma‘rifet-i mütevellî meccânen ferâğ ve tefvîz edip ol dahi iştirâ ve temellük ve kabûl eyledikden sonra semen-i mezbûr dört bin guruşunu yedinden tamâmen ahz u kabz eyledik fîmâ ba‘d menzil-i mezbûrun (…) [ebniyesi] mûmâ-ileyhâ Rukiye Hanım’ın mülk-i müşterâsı ve arsası dâhil-i havza-i tasarrufu olmuşdur keyfe mâ yeşâ ve yahtâr mutasarrıfe olsun dediklerinde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr ba‘dehû ma‘an ba‘s olunan Ahmed Beşe b. Abdullah ve Mehmed b. İdris ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’r-râbi‘ min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Abdülbâkī Efendi b. Eyyûb, Mehmed Ağa b. Ali, Ömer Ağa b. Ali, Mustafa b. İbrahim, Receb Efendi [b.] Mehmed, Cafer Ağa [b]. Derviş.