Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 101 Hüküm no: 88 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tepeviran köyünden Mehmed b. Ali'nin Yakacık köyünden Halil'in çocuklarındaki alacaklarını tahsil etmiş olduğu Yoros kazâsına tâbi‘ Tepeviran nâm karye sâkinler[inden] Mehmed b. el-Hâc Ali nâm kimesne meclis-i şer‘-i şerîfde medîne-i Üsküdar muzâfâtından Adalar nâhiyesine tâbi‘ Yakacık nâm karye sâkinlerinden işbu râfi‘ûnü’l-kitâb İsmail ve Ahmed ve İbrahim ebnâ-i Halil nâm kimesneler mahzarlarında ikrâr-ı tâm ve takrîr-i kelâm edip mezbûrûn İsmail ve Ahmed ve İbrahim zimmetlerinde keyli ve kıymeti beynimizde ilm-i şer‘î ile ma‘lûm yedimden müşterâ ve makbûz keten tohumu bahâsından ve bezirhâne icâresinden ve cihet-i karz-ı şer‘îden ba‘de külli’l-hesâb on sekiz kıt‘a esedî guruş hakkım olup meblağ-ı mezbûr on sekiz kıt‘a esedî guruşu mezbûrûn İsmail ve Ahmed ve İbrahim yedlerinden tamâmen ahz u kabz eyledim, ba‘de’l-yevm husûs-ı mezbûra müte‘allika cemî‘ da‘vâdan her birimiz âharın zimmetini ibrâ ve ıskāt eyledik dedikde gıbbe’t-tesâdukūni’ş-şer‘î mâ-hüve’l-vâki‘ bi’t-taleb ketb olundu. Mine’l-yevmi’s-sâlis ve’l-ışrîn min-Cemâziyelâhire li-sene ışrîn ve mi'e ve elf. Şuhûdü’l-hâl: el-Hâc Mehmed Ağa b. Ahmed, Mustafa Ağa b. Abdullah, Halil Ağa b. Mehmed, Mehmed Efendi b. Mustafa, Mahmud Çavuş b. Emrullah, Mahmud Beşe b. Musli, Veli Bey el-Muhzır, Mehmed Beşe b. Ali, Diğer Mehmed Beşe b. Ahmed.