Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 113 Hüküm no: 107 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Kurtiş ile Londari'nin müşterek evlerini Dimitri'ye satmaları Medîne-i Üsküdar muzâfâtından Adalar nâhiyesine tâbi‘ Kartal nâm karye sükkânından Kurtiş v. Petro ve Londari v. Londar nâm zimmîler meclis-i şer‘-i şerîfde işbu râfi‘u’s-sifr Dimitri v. Benli Savat nâm zimmî muvâcehesinde her biri ikrâr-ı tâm ve takrîr-i kelâm edip akd-i âti’z-zikrin sudûruna değin ale’l-iştirâki’s-seviyy silk-i mülkümüzde münselik olup karye-i mezbûrede vâki‘ bir tarafdan Kasper nâm Ermeni mülkü ve bir tarafdan Yorgi nâm zimmî mülkü ve bir tarafdan Dimo oğlu mülkü ve bir tarafdan tarîk-i hâs ile mahdûd biri birine muttasıl dört bâb tahtânî oda ve bir mikdâr bağçeyi müştemil mülk menzilimizi tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile mezbûr Dimitri’ye yüz üç kıt‘a esedî guruşa bey‘ ve teslîm ve temlîk eylediğimizde ol dahi ber-vech-i muharrer iştirâ ve tesellüm ve temellük ve kabz ve kabûl eyledikden sonra semeni olan meblağ-ı mezbûr yüz üç kıt‘a esedî guruşu müşteri-i mezbûr yedinden tamâmen ahz u kabz eyledik, ba‘de’l-yevm menzil-i mahdûd-ı mezkûr müşteri-i merkūmun mülk-i müşterâsı ve hakk-ı sırfıdır, bizim kat‘â alâka ve medhalimiz kalmadı, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb [ketb] olundu. Fi’l-yevmi’s-sâdis ve’l-ışrîn min-Recebi’l-mürecceb li-sene ışrîn ve mi'e ve elf. Şuhûdü’l-hâl: Mustafa Çelebi [b.] Mehmed, Mehmed Beşe [b.] Ahmed, Mustafa Beşe [b.] Mehmed, İbrahim Çelebi [b.] Mehmed, Hasan Beşe [b.] Ali, Mehmed Efendi [b.] Mustafa. Hıristos v. Kabasakal, Delibalta [v.] Kirkor.