Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 114 Hüküm no: 109 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe'nin Rukiye'ye annesi Fatma'dan intikal eden terekede hakkı olduğunu ispatlayamadığı Kartal’da Küçük Hacı Mustafa zevcesi mülknâmesidir. Mahmiye-i İstanbul’da Küçük Ayasofya mahallesi sâkinlerinden Ahmed Beşe b. Mehmed nâm kimesne medîne-i Üsküdar muzâfâtından Adalar nâhiyesinde meclis-i şer‘-i şerîfde yine nâhiye-i mezbûreye tâbi‘ Kartal nâm karye sâkinelerinden işbu râfi‘atü’l-kitâb Rukiye bt. Mehmed nâm hatun muvâcehesinde üzerine da‘vâ ve takrîr-i kelâm edip mezbûre Rukiye’nin bundan akdem müteveffiye olan vâlidesi Fâtıma bt. Abdullah nâm hatun babam mezbûr Mehmed ile li-ebeveyn karındaşlar olup müteveffiye-i mezbûrenin mecmû‘ terekesine mezbûre Rukiye vâzı‘atü’l-yed olmağın hâlâ tereke-i müteveffât-ı mezbûrenin alâ-mâ-farazallâhu te‘âlâ nısf hissesi mezbûre Rukiye’ye ve nısf-ı âharı bana isâbet etmeğin suâl olunup tereke-i müteveffât-ı mezbûreden benim hisseme isâbet eden nısf hissem alıverilmesi matlûbumdur dedikde gıbbe’s-suâl mezbûre Rukiye cevâbında fi’l-hakīka müteveffât-ı mezbûrenin mecmû‘ terekesine vâzı‘atü’l-yed olduğunu ve vâlidesi müteveffât-ı mezbûrenin merkūm Ahmed Beşe li-ümmin er karındaşı oğlu olduğunu ikrâr lâkin vech-i muharrer üzere vâlidesi müteveffât-ı mezbûrenin li-ebin dahi er karındaşı oğlu olduğunu inkâr edicek, müdde‘î-i mezbûrdan ber-vech-i muharrer müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûre Rukiye’ye minvâl-i meşrûh üzere vâlidesi müteveffât-ı mezbûre Fâtıma merkūm Ahmed Beşe’nin babası merkūm Mehmed ile li-ebin karındaşlar dahi olmadığına yemîn teklîf olundukda ol dahi alâ-vefki’l-mes'ûl half billâhi’l-aliyyi’l-azîm etmeğin mûcebiyle müdde‘î-i mezbûr Ahmed Beşe’ye bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâmin aşer min-Recebi’l-mürecceb li-sene ışrîn ve mi'e ve elf. Şuhûdü’l-hâl: Halil Ağa b. Mehmed, Musa Beşe b. Mehmed, Mehmed Efendi b. Mustafa, Ömer Çelebi b. Musa, Hasan Beşe b. Ali, Mahmud Çavuş b. Emrullah Serdâr.