Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 115 Hüküm no: 110 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Soğanlık köyünden Ali'nin evini Yorgi'ye satması Kartal’da Yorgi’nin mülknâmesidir. Medîne-i Üsküdar muzâfâtından Adalar nâhiyesine tâbi‘ Soğanlık nâm karyede sâkin el-Hâc Ali b. el-Hâc Mehmed nâm kimesne meclis-i şer‘-i şerîfde işbu bâ‘isü’s-sifr Yorgi v. İlya nâm zimmî muvâcehesinde tâyi‘an ikrâr-ı tâm ve takrîr-i kelâm edip akd-i âti’z-zikrin sudûruna değin emlâkimden olup nâhiye-i mezbûreye mülhak Kartal nâm karyede vâki‘ etrâf-ı erba‘ası Aci Tanaş ve diğer Tanaş ve Glova nâm zimmîler mülkleri ve tarîk-i âm ile mahdûd bir bâb fevkānî oda ve bir bâb tahtânî oda ve bir ahırı müştemil bir kıt‘a mülk menzilimi tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile mesfûr Yorgi’ye seksen kıt‘a esedî guruşa bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz ve kabûl eyledikden sonra semeni olan meblağ-ı mezbûr seksen kıt‘a esedî guruşu müşteri-i mezbûr Yorgi yedinden tamâmen ahz u kabz eyledim, min-ba‘d menzil-i mahdûd-ı mezbûrda benim kat‘â alâka ve medhalim kalmayıp mezbûr Yorgi’nin mülk-i müşterâsı ve hakk-ı sırfıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min-Recebi’l-mürecceb li-sene ışrîn ve mi'e ve elf. Şuhûdü’l-hâl: Mehmed Efendi [b.] Mustafa, Mustafa Çelebi b. Mehmed, el-Hâc Ali b. Mehmed, İbrahim Çelebi b. Mehmed.