Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 116 Hüküm no: 112 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Sarı Yani'nin varisleri oğlu Kiryazi ile kızı Sotyani'nin tereke konusunda sulh oldukları Medîne-i Üsküdar muzâfâtından Adalar nâhiyesine tâbi‘ Kartal nâm karye sükkânından olup bundan akdem hâlik olan Sarı Yani nâm zimmînin verâseti sulbî oğlu Kiryazi v. Sarı Yani ile sulbî kızı Sotyani bt. Sarı Yani’ye münhasıra olduğu şer‘an mütehakkık oldukdan sonra merkūm Sotyani meclis-i şer‘-i şerîfde mezkûr kız karındaşı Kiryazi muvâcehesinde ikrâr-ı tâm ve takrîr-i kelâm edip babam hâlik-i merkūmun muhallefâtından beynimizde taksîm olunmadık bir bâb fevkānî oda ve bir berber dükkânı ile iki kıt‘a bağ ve beynimizde ma‘lûm hâne içinde olan sülüs hisse-i şâyi‘amdan min-külli’l-vücûh fâriğ olmak üzere Çukurbağlar demek ile ma‘rûf bağdan bin kütük bağ ve ikimiz beyninde avludan bir tarîk-i hâs avlu-yı mezkûr duvarından bir hâne kapısı açmak üzere muslihûn tavassutuyla beynimizi ibrâ ve ıskāt eyledikden sonra karındaşım merkūm Kiryazi yedinde bedel-i sulh olan bin kütük bağdan ve havlu içinde tarîk-i hâssın duvarında olan hâne kapısından gayri bir şey da‘vâ ve nizâ‘ edersem lede’l-hükkâmi’l-kirâm mesmû‘a ve makbûle olmasın, Kiryazi vechen tasdîk ve şifâhen tahkīk edicek, mâ-vaka‘a bi’t-taleb ketb olundu, yed-i tâlibe vaz‘ olundu. Tahrîren fî-gurreti Saferi’l-hayr li-sene selâse ve sittîn ve elf. Şuhûdü’l-hâl: Mustafa Çelebi er-Râcil, Hüseyin Beşe Yasakçı, Salih Beşe b. Ali, Palalu v. Yani, Kozima v. Toma, Kozi v. Lanbortoz, Todori v. Yoz, Siranoz [v.] Kehabe?. Temme’l-kelâm fî-hâze’l-makām Nemakahû el-fakīru ileyhi azze şânühû İsmail el-müvellâ-hilâfeten bi-nâhiyeti Adalar -gufira lehû- (Mühür) [25b] Yâ Fettâh, Yâ Fettâh, Yâ Fettâh ve Yâ Rezzâk ve Yâ Rezzâk ve Yâ Rezzâk