Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 117 Hüküm no: 114 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dolayoba köyünden Ahmed Beşe'nin bağını Mustafa Beşe'ye satması Medîne-i Üsküdar muzâfâtından Adalar nâhiyesine tâbi‘ Dolayoba karyesi sükkânından Ahmed Beşe b. İlyas nâm kimesne meclis-i şer‘-i hatîr-i lâzımü’t-tevkīrde işbu hâfizü hâze’l-kitâb Mustafa Beşe b. Musa mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup Pendik hâricinde timâr toprağında vâki‘ bir tarafdan Malamat zimmî bağı ve bir tarafdan Acem Yani zimmî bağı ve bir tarafdan Yanaki bağı ve bir tarafdan tarîk-i hâs ile mahdûd tahmînen bin çubuk mülk kürûmî bağımı tarafeynden îcâb ve kabûlü hâvî bey‘-i bâtt-ı sahîh-i şer‘î ile otuz üç guruşa mezbûr Mustafa Beşe’ye bey‘ ve teslîm, ol dahi minvâl-i muharrer üzere iştirâ ve tesellüm ve temellük ve kabz u kabûl eyledikden sonra semeni olan meblağ-ı merkūm otuz üç guruşu mezbûr Mustafa Beşe yedinden tamâmen ahz u kabz eyledim, ba‘de’l-yevm bağ-ı mahdûd-ı mezkûr merkūm Mustafa Beşe’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’l-hâmis min-Ramazani’l-mübârek li-sene ışrîn ve mi'e ve elf. Şuhûdü’l-hâl: Fahrü’l-eimme Veli Efendi, Mehmed Efendi İmâm-ı karye-i Yayalar, Abdi Beşe, Halil Beşe b. İbrahim Çelebi, Ali Beşe b. Hüseyin, Bali b. Bekir ve gayruhum mine’l-huzzâr.