Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 117 Hüküm no: 115 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil ve Mustafa'nın, anneleri Meleki Hatun'dan intikal eden ev yeri davasında Ahmed Beşe ile sulh oldukları Medîne-i Üsküdar sükkânından Halil ve Mustafa ibney Ali Beşe nâm kimesneler taraflarından taleb-i da‘vâ ve sulh-ı âti’l-beyâna Mustafa Beşe b. Mahmud ve Ali Beşe b. Mustafa nâm kimesneler şehâdetleriyle vekâleti sâbite olan fahrü’l-eimme Veli Efendi b. Yahya Efendi bi’l-vekâle meclis-i şer‘-i hatîr-i lâzımü’t-tevkīrde işbu bâ‘isü hâze’l-kitâb Adalar nâhiyesine tâbi‘ karye-i Dolayoba sükkânından Ahmed Beşe b. İlyas mahzarında üzerine da‘vâ ve takrîr-i kelâm edip müvekkillerim mezbûrân Halil ve Mustafa’nın vâlideleri Meleki Hatun bundan mukaddem karye-i mezbûrede sâkin iken müteveffât edip karye-i mezbûrede vâki‘ iki tarafdan Ahmed Beşe menzili ve bir tarafdan Bali menzili ve bir tarafdan tarîk-i âm ile mahdûd harâbe mülk menzil yeri müvekkillerim mezbûrân Halil ve Mustafa’ya intikāl etmekle merkūm Ahmed Beşe’den bi’l-vekâle taleb ve da‘vâ eyledikde ol dahi gâh inkâr ve gâh ikrâr etmeğin beynimize muslihûn tavassut edip beni merkūm Ahmed Beşe ile harâbe menzil yeri da‘vâsından on guruş üzerine inşâ-i akd-i sulh eylediklerinde ben dahi sulh-ı merkūmu kabûl ve bedel-i sulh olan on guruşu bi’l-vekâle merkūm Ahmed Beşe’den ahz u kabz edip müteveffât-ı merkūmenin karye-i mezbûrede vâki‘ harâbe menzil yeri da‘vâsından merkūm Ahmed Beşe’nin zimmetini bi’l-vekâle ibrâ-i âmm-ı kātı‘u’n-nizâ‘la ibrâ ve ıskāt eyledim, ba‘de’l-yevm harâbe menzil yerine müte‘allika da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’l-hâmis min-Ramazani’l-mübârek li-sene ışrîn ve mi'e ve elf. Şuhûdü’l-hâl: İmâm Mehmed Halîfe karye-i Yayalar, Abdi Beşe ve Halil Beşe b. İbrahim Çelebi, Hüseyin Beşe b. Musli, Ali Beşe b. Hüseyin.