Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 119 Hüküm no: 117 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pendik köyünden İskerlet'in bağını Todoş ve Mosiko kardeşlere satması Medîne-i Üsküdar muzâfâtından Adalar nâhiyesine tâbi‘ Pendik karyesi sükkânından İskerlet v. Andon zimmî meclis-i şer‘-i hatîr-i lâzımü’t-tevkīrde işbu bâ‘isü hâze’s-sifr Todoş ve karındaşı Mosiko veledeyn-i Desparisto zimmîler mahzarlarında ikrâr-ı tâm ve takrîr-i kelâm edip karye-i mezbûre hudûdunda Musli Paşa Evkāfı’nda vâki‘ bir tarafdan Mehmed Efendi bağı ve bir tarafdan Hüseyin Beşe bağı ve bir tarafdan Kiryazi zimmî bağı ve bir tarafdan tarîk-i âm ile mahdûd mülk tahmînen dokuz bin çubuk hora bağımı mesfûrân Todoş ve Mosiko zimmîleri iştirâk-i seviyy üzere iki yüz on beş guruşa bey‘-i bâtt-ı kat‘î ile bey‘ edip kabz-ı semen ve teslîm-i mebî‘ eyledim, mesfûrân dahi minvâl-i muharrer üzere iştirâ ve tesellüm ve kabûl eylediklerinden sonra semeni olan meblağ-ı merkūm iki yüz on beş kıt‘a esedî guruşu mesfûrân Todoş ve Mosiko zimmîler yedlerinden bi’t-tamâm ve’l-kemâl ahz u kabz eyledim, ba‘de’l-yevm bağ-ı mahdûd-ı mezkûr mesfûrân Todoş ve Mosiko zimmîlerin iştirâk-i seviyy üzere mülk-i müşterâlarıdır, keyfe mâ yeşâ ve yahtâr mutasarrıfân olsunlar dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’l-ışrîn min-Ramazani’l-mübârek li-sene ışrîn ve mi'e ve elf. Şuhûdü’l-hâl: Halil Ağa Zâbit-i Pendik, Ali Beşe b. Hüseyin, Hüseyin Beşe b. Şaban, Ömer Beşe b. Hüseyin Beşe, Hüseyin Çelebi b. Süleyman, Oron Kosta v. Senador, Yanaki v. Kosta, Demir Yorgi v. Havar ve gayruhum mine’l-huzzâr.