Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 120 Hüküm no: 118 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pendik köyünden Dimitri'nin anbar ile odasını Marho'ya satması Medîne-i Üsküdar muzâfâtından Adalar nâhiyesine tâbi‘ Pendik karyesi sükkânından Dimitri v. Manol zimmî meclis-i şer‘-i hatîr-i lâzımü’t-tevkīrde işbu bâ‘isü hâze’s-sifr Marho v. Nikola zimmî mahzarında ikrâr-ı tâm ve takrîr-i kelâm edip karye-i mezbûrede vâki‘ bir tarafdan Yorgi zimmî menzili ve bir tarafdan Manamut zimmî menzili ve iki tarafdan tarîk-i âm ile mahdûd bir anbar ve bir odayı müştemil anbar bi-cümleti’t-tevâbi‘ ve’l-levâhık mesfûr Marho zimmîye otuz beş guruşa bey‘-i bâtt-ı kat‘î ile bey‘ ve teslîm ve kabz-ı semen eyledikden sonra ol dahi minvâl-i muharrer üzere iştirâ ve tesellüm eyledikde semeni olan meblağ-ı merkūm otuz beş guruşu mesfûr Marho zimmî yedinden bi’t-tamâm ve’l-kemâl ahz u kabz eyledim, ba‘de’l-yevm anbar ve oda-i merkūm mesfûr Marho zimmînin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ aşer min-Ramazani’l-mübârek li-sene ışrîn ve mi'e ve elf. Şuhûdü’l-hâl: Halil Ağa, Ahmed Beşe b. İlyas, İmâm-ı Yayalar Mehmed Halîfe, Veli Efendi İmâm-ı Dolayoba, Ali Beşe b. İbrahim.