Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 122 Hüküm no: 122 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yayalar köyünden Ali Beşe'nin bağını diğer Ali Beşe'ye satması Medîne-i Üsküdar muzâfâtından Adalar nâhiyesine tâbi‘ Yayalar karyesi sükkânından Ali Beşe b. Hüseyin nâm kimesne meclis-i şer‘-i hatîr-i lâzımü’t-tevkīrde işbu hâfizü hâze’l-kitâb diğer Ali Beşe b. Hüseyin mahzarında ikrâr-ı tâm ve takrîr-i kelâm edip karye-i Pendik hudûdu dâhilinde vâki‘ bir tarafdan Nafi‘ bağı ve bir tarafdan Karacan zimmî tarlası ve bir tarafdan Aci Mihal zimmî bağı ve bir tarafdan tarîk-i hâs ile mahdûd tahmînen iki bin çubuk hora bağımı bi-cümleti’t-tevâbi‘ mezbûr Ali Beşe’ye bey‘-i bâtt-ı kat‘î ile yirmi bir guruşa bey‘ ve teslîm ve kabz-ı semen eyledim, ol dahi minvâl-i muharrer üzere iştirâ ve tesellüm eyledikden sonra semeni olan meblağ-ı mezbûr yirmi bir guruşu mezbûr Ali Beşe yedinden bi’t-tamâm ahz u kabz eyledim, ba‘de’l-yevm bağ-ı mahdûd-ı mezkûr mezbûr Ali Beşe’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’l-âşir min-Şevvâli’l-mükerrem li-sene ışrîn ve mi'e ve elf. Şuhûdü’l-hâl: Abdi Beşe b. Mehmed, Mehmed Beşe b. Hüseyin, Süleyman b. Ahmed, Ahmed Beşe b. Yahya, Ali b. Hüseyin, Mahmud b. Mustafa, Halil b. Ahmed ve gayruhum mine’l-huzzâr.