Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 121 Hüküm no: 121 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yayalar köyünden Osman Beşe'nin kardeşi Ali Beşe tarafından el konulan iki oda ve bahçesini geri almak istemesi Medîne-i Üsküdar muzâfâtından Adalar nâhiyesine tâbi‘ Yayalar karyesi sükkânından Osman Beşe b. Hüseyin nâm kimesne meclis-i şer‘-i hatîr-i lâzımü’t-tevkīrde işbu bâ‘isü hâze’l-kitâb karındaşı Ali Beşe mahzarında üzerine da‘vâ ve takrîr-i kelâm edip müteveffâ babam Hüseyin’in metrûkâtından karye-i mezbûrede vâki‘ ma‘lûmü’l-hudûd ve’l-cîrân menzilin nısf-ı şâyi‘asını ki iki bâb oda ve karye-i mezbûrede vâki‘ bir tarafdan Tavukçu Hüseyin menzili ve bir tarafdan Rıza menzili ve iki tarafdan tarîk-i âm ile mahdûd tahmînen bir dönüm eşcâr-ı müsmire ve gayr-ı müsmire bağçeyi târîh-i kitâbdan sekiz sene mukaddem mezbûr Ali Beşe bana vermiş iken şimdi zabtıma mâni‘ olur, suâl olunup tenbih olunması matlûbumdur dedikde gıbbe’s-suâl akībe’l-inkâr mezbûr Ali Beşe cevâbında müteveffâ babası Hüseyin’in metrûkâtından menzil-i merkūmenin nısf hisse-i şâyi‘ası ile bağçe-i merkūmeyi târîh-i kitâbdan sekiz sene mukaddem mezbûr Osman Beşe’ye verdiğini inkâr edicek, müdde‘î-i mezbûr Osman Beşe’den sıdk-ı makāline mutâbık [ve] mübeyyin beyyine taleb olundukda udûl-ı ahrâr-ı ricâl-i Müslimînden karye-i mezbûre sükkânından Mehmed Beşe b. Musli ve Ahmed b. Yahya ve diğer Mehmed Beşe b. Mustafa nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mezbûr Ali Beşe merkūm Osman Beşe’ye târîh-i kitâbdan sekiz sene mukaddem müteveffâ babaları Hüseyin’in metrûkâtından menzilin nısf hisse-i şâyi‘ası ve bağçe-i merkūmu mezbûr Osman Beşe’ye bizim huzûrumuzda i‘tâ eyledi ve hâliyâ menzil-i merkūmun nısfı ile bağçe-i merkūm mezbûr Osman Beşe’nin zabtındadır, bizler bu husûsa bu vech üzere şâhidiz ve şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a oldukdan sonra şehâdet-i merkūm mûcebince menzil-i mezbûrenin nısf hisse-i şâyi‘ası ve bağçe-i merkūm mezbûr Osman Beşe’nin zabtına tenbîh birle mâ-hüve’l-vâki‘ bi’t-taleb ketb olundu. Hurrire fi’l-yevmi’s-sâdis min-Şevvâli’l-mükerrem li-sene ışrîn ve mi'e ve elf. Şuhûdü’l-hâl: Hüseyin Beşe, Serdâr Mahmud Çavuş, Mehmed Beşe b. Mustafa, Hüseyin Çelebi Hüddâm, Mehmed Beşe b. Musli, Ahmed b. Yahya ve gayruhum.