Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 123 Hüküm no: 124 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Kezban'ın kocası Musa Beşe'den boşanması Medîne-i Üsküdar muzâfâtından Adalar nâhiyesine tâbi‘ Kartal nâm karye sâkinelerinden Kezban bt. Mehmed nâm hatun tarafından husûs-ı âtî hul‘u ikrâra vekîl olup zât-ı mezbûreyi ma‘rifet-i şer‘iye ile ârifân olan Hasan Çelebi b. Ali ve Mehmed Beşe b. Musli nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan fahrü’l-akrân Mehmed Ağa b. Ahmed Serdâr meclis-i şer‘-i şerîf-i enverde müvekkile-i mezbûrenin zevc-i dâhilün-bihâsı olan işbu sâhibü’l-kitâb Musa Beşe b. Mustafa mahzarında bi’l-vekâle ikrâr-ı tâm ve takrîr-i kelâm edip müvekkile-i mezbûre merkūm Musa ile beynlerinde hüsn-i zindegâne olmayıp şikāk olmağla mezbûr Musa’nın zimmetinde mütekarrer ve ma‘kūdün-aleyh beş bin akçe mehr-i müecceli ve iddet-i nafaka ve me'ûnet-i süknâsı dahi kendü üzerine olmak üzere bi’l-vekâle muhâla‘a-i sahîha-i şer‘iye ile hul‘ olup mezbûr Musa dahi meblağ-ı mezbûru kabûl ve hîn-i zevciyetden yevm-i muhâla‘aya gelince beynlerinde olan ahz [ü] i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan ahadühümâ âharın zimmetlerini ibrâ ve ıskāt eylediler dedikde mezbûr Musa Beşe dahi bi’l-muvâcehe tasdîk ve tahkīk edicek, hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri …? nâs ile hüküm birle kayd şüd. Fî Şevvâl sene 1121 Şuhûdü’l-hâl: İsmail Efendi [b.] Mehmed Hatib, el-Hâc Mahmud Ağa b. Yakub, Himmet Ağa b. Mehmed, Mehmed Efendi [b.] Ahmed el-Müezzin, el-Hâc Ali b. Mehmed, Halil b. Mehmed, Musli Bey b. Mehmed, Ali Beşe [b.] Ramazan, İbrahim el-Müezzin, Ahmed Çelebi b. Mustafa, İbrahim Çelebi b. Mehmed.