Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 123 Hüküm no: 125 Orijinal metin no: [27a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalar kazası yeniçeri serdarının azledilerek yerine yirmi ikinci bölüğün yoldaşı Mehmed'in tayini Şerî‘at-şi‘âr Adalar kādısı efendi tahiyyât-ı sâfiyât ithâfından sonra muhibbâne inhâ olunur ki, taht-ı kazânızda vâki‘ yeniçeri serdârı ref‘ olunup yerine üslûb-ı sâbık üzere yirmi ikinci bölüğün yoldaşı Mehmed nâm mütekā‘id -zîde kadruhû- nasb [ve] ta‘yîn olunmağın işbu mektûb tahrîr ve irsâl olunmuşdur. Vusûlünde gerekdir ki, mezbûru serdârlığı umûrunda istihdâm edip âharı dahl etdirmeyesiz, ol cânibde vâki‘ yeniçeri ve cebeci ve topçu ve gılmân-ı acemî ve kuloğulları merkūmu üzerlerine serdâr ve zâbit bilip sözünden taşra ve re'yinden hâric vaz‘ [ü] hareket etmeyip itâ‘at ve inkıyâd üzere olalar ve tevâif-i mezbûreden bilâ-vâris-i ma‘rûf fevt olanların muhallefât ve metrûkâtları ma‘rifet-i şer‘le mezbûra ahz u kabz ve sûk-ı sultânîde fürûht etdirdip hâsıl olan nükūdu mümzâ ve mahtûm müfredât defterleriyle bu cânibe irsâl etdirile ve lâkin hilâf-ı şer‘ ve kānûn bir ferde rencîde ve remîde etdirilmeye. Tahrîren fî-evveli şehri Şevvâl sene 1121 Mustafa Ağa Yeniçeriyân-ı Dergâh-ı âlî hâlâ.