Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 124 Hüküm no: 127 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Hatice'nin el konularak başkalarına satılan ve Hürmüz'ün elinde bulunan bağını geri almak istemesi Medîne-i Üsküdar muzâfâtından Adalar nâhiyesine tâbi‘ Kartal nâm karyede sâkine sâhibetü hâzihi’l-kitâb Hadice bt. Abdullah nâm hatun tarafından husûs-ı âtî bağı vâzı‘u’l-yed olanlardan da‘vâ ve taleb [ve] ahz u kabza vekîl olup mezbûrenin zâtını ma‘rifet-i şer‘iye ile ârifân olan Musa Beşe b. Mehmed ve Hüseyin Çelebi b. Hasan şehâdetleri ile vekîl [olup] vekâleti sâbite ve sübût-ı vekâletine hükm-i şer‘î lâhık olan mezbûre Hadice’nin zevc-i dâhilün-bihâsı Halil Ağa b. Mehmed nâm kimesne meclis-i şer‘-i şerîf-i enverde ve mahfil-i dîn-i münîf-i ezherde yine karye-i mezbûre Kartal mütemekkinlerinden Hürmüz v. Kamanoz nâm zimmî muvâcehesinde üzerine bi’l-vekâle da‘vâ ve takrîr-i kelâm edip müvekkilem mezbûrenin mevlâsı müteveffâ Ahmed Ağa b. Hasan târîh-i kitâbdan sekiz sene mukaddem karye-i mezbûre sınırı dâhilinde vâki‘ bir tarafdan Odabaşı Hacı Hasan bağı ve bir tarafdan Çoban Nikola bağı ve bir tarafdan Receb Beşe bağı ve bir tarafdan tarîk-i âm ile mahdûd tahmînen on bin çubuk hora üzümü bağını müvekkile-i mezbûreye ba‘de’l-… tarafeynden îcâb ve kabûlü hâvî altmış guruşa bey‘ ve teslîm ve temlîk edip müvekkile-i mezbûre Hadice dahi vech-i muharrer üzere iştirâ ve tesellüm ve kabz ü kabûl eyledikden sonra semeni olan meblağ-ı mezkûr altmış guruşu müşteri-i müvekkile-i mezbûre yedinden tamâmen ahz u kabz edip mülk-i müşterâsı olup mutasarrıfa iken merkūm Ahmed Ağa fevt oldukdan dört sene mürûrunda tegallübeden ve eşkıyâdan oğlu Mustafa nâm kimesne müvekkile-i mezbûrenin yedinden mülknâmelerin cebren ahz ve âhara bey‘ edip tedâvül-i eydî ile mesfûr Hürmüz hâlâ vâzı‘u’l-yed bulunmağın yedine taraf-ı Devlet-i Aliyye’den şeyhülislâm hazretleri tarafından fetvâ-yı şerîf mûcebince fermân-ı âlî ısdâr etmeğin sâlifü’z-zikr bağın mezbûr Hürmüz’e suâl olunup kasr-ı yedine tenbîh olunması bi’l-vekâle matlûbumdur dedikde gıbbe’s-suâl mesfûr Hürmüz cevâbında sâlifü’z-zikr bağ hâlâ taht-ı yedinde olup mahmiye-i İstanbul’da Balat nâm mahâlde sâkin Nataş ve kāyınatası Aslan nâm Yahûdilerden târîh-i kitâbdan bir sene mukaddem seksen guruşa iştirâ eyledim, müvekkile-i mezbûrenin mülkü olduğu ma‘lûmum değildir deyü inkâr edicek, vekîl-i merkūm Halil Ağa’nın müdde‘âsını mübeyyin beyyine taleb olundukda udûl-ı ricâl-i Müslimînden olup yine Kartal sükkânından el-Hâc Ali b. Mehmed ve el-Hâc Ahmed b. Halil ve Mehmed Bey b. Ali ve İsmail b. Mustafa nâm kimesneler meclis-i şer‘a hâzırân olup istişhâd olundukda her biri cevâblarında fi’l-hakīka müteveffâ Ahmed Ağa b. Hasan târîh-i mezkûrda bizim huzûrumuzda mârr[u’z]-zikr bağı mezbûr Hadice’ye altmış guruş[a] bey‘ ve teslîm, ol dahi iştirâ ve tesellüm eyledikden sonra oğlu mütevakkıf? Mustafa mütegallibeden ve eşkıyâdan olmağın mezbûrenin yedinden mülknâmelerin ahz ve bağı ol Yahûdilere fuzûlen bey‘ eyledi, bizler bu husûsa şâhidleriz, şehâdet dahi ederiz deyü her biri edâ-i şehâdet-i şer‘iye eyledikden sonra ba‘de ri‘âyeti şerâiti’l-kabûl hayyiz-i kabûlde vâki‘ olup mezbûre Hadice merkūm mütevakkıf? Mustafa bağı Yahûdilere bey‘ eyledi dediğine yemîn edicek, mâ-vaka‘a gıbbe taleb ketb olundu. Fî-yevmi hâdî aşer min-Zilhicce sene 1121 Şuhûdü’l-hâl: Mustafa Beşe b. Mehmed, Musa Beşe b. Mehmed, Mehmed Bey b. Ali, Ahmed Beşe b. Şeyh, Monlâ Hasan b. Ali, Monlâ Mehmed b. Süleyman, Mehmed Beşe b. Osman.