Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 125 Hüküm no: 128 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Hatice'nin el konularak başkalarına satılan ve Hürmüz'ün elinde bulunan bağını geri alması Medîne-i Üsküdar muzâfâtından Adalar nâhiyesine tâbi‘ Kartal nâm karyede sâkine Hadice bt. Abdullah nâm hatun tarafından ibrâya vekîl olup zât-ı mezbûreyi ma‘rifet-i şer‘iye ile ârifân olan el-Hâc Ali b. Mehmed ve Abdullah Çelebi b. İbrahim Efendi şehâdetleriyle sâbit ve sübût-ı vekâletine hükm-i şer‘î lâhık olan zevc Halil b. Mehmed nâm kimesne mezbûr Hadice tarafından ve sulbî sagīr oğlu İbrahim tarafından velâyeten meclis-i şer‘-i şerîf-i enverde işbu sâhibü’s-sifr Balat nâm mahâlde mütemekkin Aslan v. Yani nâm Yahûdi muvâcehesinde asâleten ve vekâleten ikrâr-ı tâm ve takrîr-i kelâm edip bundan akdem fevt olan Ahmed Ağa b. Hasan nâm müteveffânın sulbiye sagīre kızı olup müvekkile-i mezbûreden mütevellide olan Ümmügülsün nâm sagīreye müteveffâ-yı mezbûr Ahmed Ağa yine karye-i mezbûre toprağında vâki‘ Çeşmebaşı nâm mevzi‘de bir tarafdan Hüseyin bağı ve bir tarafdan Tavukpazarlı Hasan bağı ve bir tarafdan tarîk-i âm ile mahdûd on bir bin çubuk hora üzümü bağı sagīre müteveffiye Ümmügülsüm’e babası müteveffâ-yı merkūm Ahmed Ağa hibe ve teslîm ve yine velâyeten sagīr içün kabz ( ) müteveffiye Ümmügülsüm’ün mülk-i mevhûbesi olmuş iken merkūm Ahmed Ağa fevt oldukda oğlu müteveffâ Mustafa tegallübâne mârru’z-zikr bağı babası terekesinden olmak üzere işbu mesfûr Yahûdilere deyn mukābelesinde bey‘ edip müteveffiye-i mezbûre Ümmügülsüm’ün tashîh-i meselesi altı sehm olup sihâm-ı mezkûr i‘tibârıyla iki sehm müvekkile-i mezbûre Hadice’ye ve bir sehm li-ümmin karındaşı İbrahim’e ve üç sehm müteveffâ Mustafa ile karındaşı Ali nâm sagīre münhasır olup mârru’z-zikr bağdan müvekkile-i mezbûreye ve oğlum İbrahim nâm sagīre isâbet eden üç sehmi taleb ve da‘vâ içün mesfûr Yahûdi vâzı‘u’l-yed olmağın taleb içün fermân-ı şerîf ihrâc etdirmiş idi, da‘vâ sadedinde iken beynlerinde nizâ‘-ı kesîr vukū‘undan sonra el-hâletü hâzihî beynlerine muslihûn tavassut edip bundan akdem müvekkile-i mezbûrenin dahi mülk-i şer‘îsi olup lede’l-ahâlî ve’l-cîrân ma‘lûmü’l-hudûd hora bağı dahi mezbûr Yahûdi’ye Mustafa nâm müteveffâ tegallübâne deyn mukābelesinde bey‘ edip ol dahi Kartal sükkânından Hürmüz v. Kamarnoz nâm zimmîye bey‘ edip müvekkilem mezbûre dahi fermân-ı şerîf çıkarıp vâzı‘u’l-yed olan mesfûr Hürmüz yedinden almağla mârru’z-zikr bağın dahi nısfını mersûm Aslan Yahûdi’den almağla gadr-ı küllî mülâhazasıyla zikr olunan bağdan sülüs sehm da‘vâsından mesfûr Yahûdi’nin zimmetini ibrâ-i âmm-ı râfi‘u’l-hisâm ile ibrâ ve ıskāt eyledi dedikde mesfûr Yahûdi dahi müvekkile-i mezbûrenin müstahak çıkıp aldığı bağı da‘vâsından deynini ibrâ ve ıskāt eyledi, ba‘de’l-yevm tarafeynin husûsât-ı mezkûrâtdan âmme-i da‘vâdan birbirlerinin zimmetlerini ibrâ ve ıskāt eylediler dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe li-sene ihdâ ve ışrîn ve mi'e ve elf. Şuhûdü’l-hâl: Veli Beşe b. Ali, Mustafa Çelebi b. Ömer, Ahmed Çelebi b. Hüseyin, Ahmed Beşe b. Musa, Deli Mehmed b. Abdullah, Mehmed Beşe b. Musli, Mehmed Beşe b. Yunus, Ebubekir Beşe b. Hüseyin, Hacı Mehmed b. Yakub, Hasan Beşe b. Ali, İsmail b. Abdullah, İbrahim b. Abdullah ve gayruhum.