Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 130 Hüküm no: 136 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Drador'un mülk evini Bogos'a satması Medîne-i Üsküdar’a muzâfe Adalar nâhiyesine tâbi‘ Kartal karyesi sükkânından Drador? v. Aleksan[dırı] Ermeni tarafından bey‘-i âti’l-beyâna vekâleti Mehmed Beşe b. Seyyid Ahmed ve Hüseyin Beşe b. Mehmed nâm kimesneler şehâdetleriyle vekâleti sâbite olan Mehmed Odabaşı b. Ahmed bi’l-vekâle meclis-i şer‘-i hatîr-i lâzımü’t-tevkīrde işbu râfi‘u hâze’s-sifr Bogos v. Makdiros Ermeni mahzarında bi’l-vekâle ikrâr ve takrîr-i kelâm edip müvekkil-i mesfûr Drador? Ermeninin akd-i âti’z-zikrin sudûruna değin silk-i mülkünde münselik olup bir tarafdan Mariya Nasrâniye menzili ve bir tarafdan Papa Nikos Ermeni menzili ve bir tarafdan hisâr duvarına muttasıl ve bir tarafdan tarîk-i âm ile mahdûd bir bâb fevkānî oda ve bir bâb tahtânî oda ve yine kurbünde bir bâb tahtânî odayı müştemil mülk menzilini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı kat‘î ile bi’l-vekâle mesfûr Bogos Ermeniye yüz kıt‘a esedî guruşa bey‘ ve teslîm ve kabz-ı semen eyledikde ol dahi minvâl-i muharrer üzere iştirâ ve tesellüm ve kabz eyledikden sonra semeni olan meblağ-ı merkūm yüz guruşu mesfûr Bogos Ermeni yedinden bi’l-vekâle ahz u kabz eyledim, ba‘de’l-yevm menzil-i mahdûd-ı mezkûr mesfûr Bogos Ermeninin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-ışrîn min-Rebî‘i’l-ûlâ li-sene isnâ ve ışrîn ve mi'e ve elf. Şuhûdü’l-hâl: Mehmed Ağa Zâbit-i Kartal, el-Hâc Ahmed Ağa b. Mehmed Ağa, Ömer Beşe b. İbrahim, Hüseyin Beşe b. İsmail, Hüseyin Beşe b. Mehmed, Musa [b.] Mustafa, Mehmed Çelebi b. Süleyman.