Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 132 Hüküm no: 140 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalar nahiyesi yeniçeri serdarının görevden alınarak yerine yirmi ikinci bölükden Mehmed Beşe'nin tayini Şerî‘at-şi‘âr Adalar kādısı efendi [tahiyyât-ı] sâfiye ithâfından sonra muhibbâne inhâ olunur ki, taht-ı kazânızda vâki‘ yeniçeri serdârı ref‘ olunup yerine üslûb-ı sâbık üzere yirmi iki bölüğün Mehmed Beşe nâm yoldaş serdâr nasb ü ta‘yîn olmağın işbu mektûb tahrîr ve irsâl olunmuşdur, vusûlünde gerekdir ki mezbûru serdârlık umûrunda istihdâm edip âharı dahl ve ta‘arruz etdirmeyesiz ve o cânibde vâki‘ yeniçeri ve cebeci ve topçu ve gılmân-ı acemî ve kuloğulları merkūmu üzerlerine serdâr ve zâbit bilip sözünden taşra ve re'yinden hâric vaz‘ ü hareket etmeyip itâ‘at ve inkıyâd üzere olalar ve tavâif-i mezbûreden bilâ-vâris fevt olanların muhallefâtların ve metrûkâtların ma‘rifet-i şer‘le mezbûra ahz u kabz ve sûk-ı sultânîde fürûht etdirip hâsıl olan nükūdun mümzâ ve mahtûm defterler ile bu cânibe irsâl etdirile ve lâkin hilâf-ı şer‘ ve kānûn bir ferde rencîde ve remîde etdirilmeye. Tahrîren fî-evâsıtı şehri Şa‘bân li-sene isnâ ve ışrîn ve mi'e ve elf. Yusuf Ağa-yı Yeniçeriyân-ı Dergâh-ı âlî hâlâ.