Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 132 Hüküm no: 139 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyhli köyünden Veli, Hasan ve Ali'nin mülk evlerini Ahmed Beşe'ye satmaları Medîne-i Üsküdar muzâfâtından Adalar nâhiyesine tâbi‘ Şeyhli nâm karye sükkânından Veli ve Hasan ve Ali ebnâ-i Sefer nâm kimesneler taraflarından ber-vech-i âtî ikrâra vekîl olup Mustafa Efendi b. Ali ve Mustafa Ağa b. Kasım nâm kimesneler şehâdetleriyle şer‘an vekâleti sâbite olan İbrahim Beşe b. Hasan nâm kimesne meclis-i şer‘-i şerîfde işbu râfi‘u’l-kitâb Ahmed Beşe b. Mehmed mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilûn-ı mezbûrûnun silk-i mülklerinde münselik olup karye-i mezbûrede vâki‘ bir tarafı Deli Mehmed mülkü ve bir tarafı Karga Veli mülkü ve bir tarafı diğer Mehmed mülkü ve bir tarafı tarîk-i âm ile mahdûd bir bâb tahtânî oda ve bir sofa ve hayatı ve havluyu müştemil mülk menzillerini tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Ahmed Beşe’ye yirmi sekiz guruşa bey‘ ve teslîm eylediklerinde ol dahi ber-vech-i muharrer iştirâ ve tesellüm ve kabz ü kabûl eyledikden sonra semeni olan meblağ-ı mezbûr yirmi sekiz kıt‘a esedî guruşu müvekkilûn-ı mezbûrûn müşteri-i merkūm Ahmed Beşe yedinden tamâmen ahz u kabz eylediler, min-[ba‘d] menzil-i mahdûd-ı mezkûrda müvekkilûn-ı mezbûrûnun kat‘â alâka ve medhalleri kalmadı, müşteri-i mezbûrun mülk-i müşterâsı ve hakk-ı sırfıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Cemâziyelûlâ li-sene isnâ ve ışrîn ve mi'e ve elf. Şuhûdü’l-hâl: Mustafa Ağa Serdâr, İlyas Beşe b. Hızır, Mehmed Beşe b. Musli, Mustafa Beşe b. Abdullah, diğer Mustafa Beşe b. Mehmed ve gayruhum.