Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 190 Hüküm no: 278 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Odabaşı'nın Adalar'a yeniçeri serdarı tayin edildiği Şerî‘at-şi‘âr Adalar nâhiyesinde kādısı efendi tahiyyât-ı sâfiye ithâfından sonra muhibbâne inhâ olunur ki, taht-ı kazânda vâki‘ yeniçeri serdârı ref‘ olunup yerine üslûb-ı sâbık üzere Otuz Sekiz Cemâ‘at’in Ahmed Odabaşı nâm mütekā‘id nasb ü ta‘yîn olunmağın işbu mektûb tahrîr ve irsâl olunmuşdur. Vusûlünde gerekdir ki, mezbûru serdârlığı umûrunda istihdâm edip âharı dahl etdirmeyesiz ve ol cânibde vâki‘ yeniçeri ve cebeci ve topçu ve gılmân-ı acemî ve kuloğulları, mezbûru üzerlerine serdâr ve zâbit bilip sözünden taşra ve re'yinden hâric vaz‘ ü hareket etmeyip itâ‘at ve inkıyâd üzere olalar ve tavâif-i mezbûreden bilâ-vâris-i ma‘rûf fevt olanların muhallefât defter-i müfre[dâ]tları ma‘rifet-i şer‘le mezbûra ahz u kabz ve sûk-ı sultânîde fürûht etdirip hâsıl olan nükūdu mümzâ ve mahtûm defterleriyle bu cânibe irsâl etdirile ve lâkin hilâf-ı şer‘ ve kānûn bir ferde rencîde vü remîde bâkī hemîşe eyyâm-ı şerî‘at bâd. Tahrîren fî-evâhiri Muharremi’l-harâm sene ihdâ ve ışrîn ve mi'e ve elf. Mustafa Ağa, Ağa-yı Dergâh-ı âlî.