Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 194 Hüküm no: 284 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa'nın bağını İbrahim'e satması Medîne-i Üsküdar muzâfâtından Adalar nâhiyesine tâbi‘ Soğanlık nâm karye sâkinlerinden Mustafa b. (°) nâm kimesne meclis-i şer‘-i şerîf-i enverde Samandıra nâm karye sâkinlerinden işbu bâ‘isü’l-kitâb İbrahim b. Hacı Mustafa nâm kimesne mahzarında bi-tav‘ihî ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülküm olup karye-i Soğanlık toprağında vâki‘ bir tarafdan Ali ve bir tarafdan müşteri ve bir tarafdan Abdi Beşe ve bir tarafdan tarîk-i âm tahmînen iki bin beş yüz çubuk kürûmu mülk bir kıt‘a bağımı İbrahim Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile yirmi iki esedî guruşa bey‘ ve teslîm ve temlîk eylediğimde ol dahi vech-i muharrer üzere iştirâ ve tesellüm ve temellük ve kabz ve kabûl eyledikden sonra semen olan meblağ-ı mersûm yirmi kıt‘a esedî guruşu müşteri-i mezbûr yedinden tamâmen ahz u kabz eyledim. Şuhûdü’l-hâl: el-Hâc Mehmed b. Yakub, Hasan Beşe b. Ali, Ahmed b. Mustafa, Mehmed b. Ahmed, Bekir Beşe b. Abdullah.