Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 195 Hüküm no: 287 Orijinal metin no: [51a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabgirli Mehmed'in bağını İzoli Ahmed Beşe'ye satması Fi’l-asl vilâyet-i Anadolu’da Arabgir kazâsından olup hâlâ İstanbul’da mutavattın medîne-i Üsküdar muzâfâtından Adalar nâhiyesine tâbi‘ Yakacık nâm karyede müsâferetle sâkin el-Hâc Mehmed nâm kimesne meclis-i şer‘de işbu hâfızü’l-kitâb İzoli Ahmed Beşe nâm kimesne mahzarında bi-tav‘ihî ikrâr ve i‘tirâf edip akd-i âti’z-zikrin sudûruna değin kürûmu mülk Soğanlık nâm karye toprağında vâki‘ bir tarafdan Veli Hüseyin ve bir tarafdan Kör Mehmed ve yine bir tarafdan Hüseyin tarlası ve bir tarafdan tarîk-i âm ile mahdû[d] tahmînen dört dönüm bir kıt‘a bağımı tarafeynden îcâb ve kabûlü hâvî bey‘-i bâtt-ı sahîh-i şer‘î ile kırk esedî guruşa bey‘ ve teslîm ve temlîk eyledim ol dahi vech-i muharrer üzere iştirâ ve tesellüm-i mebî‘ ve temellük ve kabz ve kabûl eyledikden [sonra] semeni olan meblağ-ı mersûm kırk esedî guruşu müşteri-i mezbûr yedinden tamâmen ahz u kabz eyledim. Ba‘de’l-yevm bağ-ı mahdûd-ı mezkûr mezbûr Ahmed Beşe’nin mülk-i müşterâsı ve hakk-ı sırfıdır, benim kat‘â alâka ve medhalim kalmadı, keyfe mâ yeşâ ve yahtâr mutasarrıf olsun dedikde gıbbe’t-tasdîk mâ-vaka‘a bi’t-taleb ketb olundu. Hurrire fî-evâsıtı Muharremi’l-harâm li-sene ihdâ ve ışrîn ve mi'e ve elf. Şuhûdü’l-hâl: Süleyman Efendi el-imâm, Abdülbaki Çelebi, Hüseyin Beşe, Ömer Beşe, İvaz Ağa, el-Hâc Mehmed. Temmetü’l-kelâm fî-hâze’l-makām, nemekahü’l-fakīr ileyhi azze şânühû Mustafa el-müvellâ-hilâfeten bi-nâhiyei Adalar -ufiye anhu-. (Mühür)