Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 195 Hüküm no: 286 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun'un bağını Hüseyin b. Salih'e sattığı Medîne-i Üsküdar muzâfâtından Adalar nâhiyesine tâbi‘ Şeyhli nâm karye sâkinelerinden Âişe bt. Mehmed nâm hatun tarafından bey‘-i âti’z-zikri ikrâra ve tescîle vekîl olup zât-ı mezbûreyi bi’l-ma‘rifeti’ş-şer‘iye ârifân olan Ali b. Hüseyin ve Salih b. Mehmed nâm kimesneler şahâdetleriyle vekâleti sâbite olan Mehmed b. Hüseyin nâm kimesne mahfil-i kazâda işbu bâ‘isü’l-kitâb Hüseyin b. Salih nâm kimesne mahzarında bi’l-vekâle ikrâr-ı tâm ve takrîr-i kelâm edip akd-i âti’z-zikrin sudûruna değin müvekkilem mezbûrenin silk-i mülkünde münselik olup Kurt nâm karye toprağında vâki‘ bir tarafdan Demircioğlu Mehmed bağı ve bir tarafdan müşteri-i mezbûr bağı ve bir tarafdan yine Demircioğlu tarlası ve bir tarafdan tarîk-i âm ile mahdûd tahmînen iki dönüm bir kıt‘a kürûmu mülk bağını tarafeynden îcâb ve kabûlü hâvî şürût-ı müfsideden ârî râyic fi’l-vakt mezbûr Hüseyin’e altı guruşa bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzere iştirâ ve tesellüm-i mebî‘ ve kabûl eyledikden sonra semeni olan meblağ-ı mersûm altı guruşu müşteri-i mezbûr Hüseyin yedinden müvekkilem mezbûre Âişe tamâmen ahz u kabz eyledi dedikde gıbbe’ş-şer‘î mâ-vaka‘a bi’t-taleb ketb olundu. Tahrîr[en] fî-şehri Muharremi’l-harâm li-sene ihdâ ve ışrîn ve mi'e ve elf. Şuhûdü’l-hâl: İmâm Ahmed Efendi, Serdâr Mustafa Ağa, el-Hâc Mehmed b. el-Hâc Ahmed, el-Hâc Mehmed b. İsmail ve gayruhum mine’l-hüzzâr.