Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 200 Hüküm no: 294 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa'nın elindeki berat şartlarına göre tuz satmasına engel olunmaması Fahrü’l-müderrisîni’l-kirâm nâhiye-i Gekbüze ve Karamürsel ve Adalar nüvvâbı el-mükerremûn ba‘de’s-selâm inhâ olunur ki, Ahyolu memlehası mukāta‘ası emîni olan es-Seyyid Mehmed Ağa nâm kimesne Mahrûse-i Bursa’da vâki‘ merhûm Sultan Yıldırım Bayezid Han -tâbe serâhu- Evkāfı’ndan Tuzla karyesi mültezimi ve vakf-ı mezbûr mütevellîsi vekîli İstanbul’da tuz emîni ile mürâfa‘a-i şer‘ olup mezbûr es-Seyyid Mehmed Ağa’nın yedinde olan emr-i şerîf ve berât-ı âlîşân şürûtu üzere mîrî tuzu kadîmî memleha-i mezbûrun örüsü olan mahallerde fürûht ve âharın tuzundan kānûn ve defter mûcebince onar akçe resimlerin ma‘rifet-i şer‘le tahsîl etdirip hilâf-ı şürût-ı berât-ı âlîşân ve mugāyir-i emr-i şerîf kimesneye ta‘allül ve âhardan müdâhele ve izâ‘at-ı emvâl-i mîrî etdirilmemek üzere emîn-i mezbûrun yedine müceddeden fermân-ı cihân-mutâ‘ i‘tâ olunmağın mûcebince mürâsele tahrîr ve emîn-i mezbûra verilmişdir. Her kangınızın taht-ı kazâsına vardıkda yedinde olan fermân-ı âlîşân mantûkunca amel edip âhardan bir ferdi müdâhale ve mu‘âraza etdirmeyip mûceb-i emr-i âlî ile amel buyurasız ve’s-selâm. Fî 26 Şa‘bân sene 1126 El-Fakīr İsmail el-müvellâ-hilâfeten bi-medîneti Üsküdar