Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 212 Hüküm no: 323 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe'nin kardeşi Ali Beşe'yi mallarını alıp satması için vekil tayin ettiği Vilâyet-i Anadolu’dan Çorum nâm şehirde Yavru Turna mahallesi sükkânından Ali Beşe b. Ma‘den nâm kimesnenin karındaşı Hasan Beşe meclis-i şer‘-i hatîrde medîne-i Üsküdar muzâfâtından Adalar nâhiyesi tevâbi‘inden Kartal karyesi ahâlîsi mahzarlarında takrîr-i kelâm ve bast ani’l-merâm edip karındaşım mezbûr Ali Beşe karye-i mezbûrede bağ ve sâir mülk ve mâl ıtlâk olunur şeyler ahz u kabzına ve bey‘ine ve tarafına îsâle beni vekîl ve nâib-i menâb nasb ü ta‘yîn etmekle el-hâletü hâzihî ben dahi karındaşım mezbûrun isnâd eylediğini ahz u kabz ve bey‘ murâd eylediğimde karye-i mezbûre ahâlîsi mâni‘ olurlar, suâl olunup aldırılması matlûbumdur dedikde, gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda, udûl-i ahrâr-ı ricâl-i Müslimînden şehr-i mezbûrda mahalle-i mezbûre sükkânından Mehmed Çelebi b. İbrahim ve İbrahim Çelebi b. Ahmed ve Himmet Ağa b. Mehmed li-ecli’ş-şehâde meclis-i şer‘de hâzırûn olup isre’l-istişhâd fi’l-hakīka müvekkil-i mezbûr Ali Beşe b. Ma‘den’in karındaşı Hasan Beşe’yi karye-i mezbûrede vâki‘ bağ ve sâir mülk ve mâl ıtlâk olunur şeyleri ahz u kabz ve bey‘e bizim huzûrumuzda vekîl ve nâib-i menâb nasb ve ta‘yîn ol dahi muvâcehesinde kabûl eyledi deyü her biri alâ-vukū‘ihî ihbâr etmeleriyle mâ-vaka‘a ketb olundu. Fî-gurreti Zilka‘de sene [1]123 Şuhûdü’l-hâl: Halil Ağa b. Mehmed, İsmail Efendi b. Mehmed Efendi, Halil Çelebi b. el-Hâc Ahmed, el-Hâc Yusuf b. Abdurrahman, ...? b. Mehmed Efendi, Mustafa Beşe b. Mehmed, Ahmed Beşe b. Mustafa, Monlâ Mehmed b. Süleyman, Mehmed Çelebi b. Ali, el-Hâc Mehmed b. Yakub.