Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 212 Hüküm no: 324 Orijinal metin no: [57b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe'nin bağını, vekili Hasan Beşe'nin İsmail Beşe'ye sattığı Vilâyet-i Anadolu’dan Çorum nâm şehirde Yavru Turna mahallesinde sâkin Ali Beşe b. Ma‘den nâm kimesnenin tarafından vekîl-i sâbitü’l-vekâleti karındaşı Hasan Beşe meclis-i şer‘-i hatîrde medîne-i Üsküdar nevâhîsinden Adalar nâhiyesi tevâbi‘inden Kartal nâm karyede sâkin İsmail Beşe b. Yakub mahzarında ikrâr ve takrîr-i kelâm edip müvekkilim mezbûr Ali Beşe’nin akd-i âtî sudûruna değin silk-i mülkünde münselik olup karye-i mezbûrede vâki‘ bir tarafı müşteri-i mezbûr bağı ve bir tarafı yine müşteri-i mezbûr tarlası ve bir tarafı Danyeloğlu bağı ve bir tarafı tarîk-i hâs ile mahdûd ve mümtâz olan bir parça bağı vekâletim hasebiyle mezbûr İsmail Beşe’ye altı guruşa bey‘ ve temlîk ü teslîm, ol dahi ber-vech-i muharrer iştirâ ve temellük ve kabz ü kabûl eyledikden sonra semeni olan meblağ-ı mezbûr altı guruşu mezbûrun yedinden tamâmen ahz u kabz eyledim, min-ba‘d bağ-ı mahdûd-ı mezbûr, merkūm İsmail Beşe’nin mülk-i müşterâsıdır, keyfe mâ yeşâ ve yahtâr mutasarrıf olsun. Fî 5 Zilka‘de sene [1]153