Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 214 Hüküm no: 327 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agna ve oğlu Kirkor'un bağlarını Osman Beşe'ye sattıkları Medîne-i Üsküdar muzâfâtından Adalar nâhiyesine tâbi‘ Kartal nâm karyede sâkine Agna v. Bogos nâm zimmiye tarafından husûs-ı âti’l-beyânda vekîl olduğu Mustafa Çelebi b. Ömer ve Kirkor v. Serkiz şehâdetleriyle sâbit ve sübût-ı vekâletine hükm-i şer‘î lâhık olan Hasan Çelebi b. Ali vekâleten ve mezbûrenin oğlu Kirkor v. Serkiz asâleten meclis-i şer‘-i şerîfde işbu bâ‘isü’l-kitâb Osman Beşe b. Abdullah mahzarında bi’l-vekâle ve bi’l-asâle ikrâr ve takrîr-i kelâm edip müvekkile-i mezbûrem Agna v. Bogos’un karye-i mezbûrede vâki‘ Hendekler nâm mahâlde bir tarafı Ali Beşe bağı ve bir tarafı Ak Mustafa oğlu İbrahim Çelebi bağı ve bir tarafı Mardiros zimmî bağı ve bir tarafı tarîk-i âm ile mahdûd ve mümtâz tahmînen dört bin çubuk mülk hora bağını fiddî râyicü’l-vakt otuz guruşa mezbûr Osman Beşe’ye bi’l-vekâle bey‘ ve temlîk ve teslîm ol dahi iştirâ ve temellük ve tesellüm ve kabûl eylediğinden sonra ben dahi karye-i mezbûrede vâki‘ bir tarafı el-Hâc Nebi bağı ve bir tarafı mezbûr Ali Beşe bağı ve bir tarafı Belek bağı ve bir tarafı Sahak zimmî bağı ile mahdûd ve mümtâz tahmînen beş yüz çubuk mülk hora bağı ve bir mazala? kış bağımı fiddî râyicü’l-vakt kırk beş guruşa merkūm Osman Beşe’ye bi’l-asâle bey‘ ve temlîk ve teslîm ol dahi iştirâ ve temellük ve tesellüm ve kabûl eyledikden sonra bâgāt-ı mezbûrâtın semenleri olan meblağ-ı mezbûr otuz guruş ve kırk beş guruşu bi’l-vekâle ve bi’l-asâle merkūm Osman Beşe yedinden tamâmen ahz u kabz eyledik, fîmâ-ba‘d bâgāt-ı mezbûrât merkūm Osman Beşe’nin mülk-i müşterâsı olmuşdur, keyfe mâ yeşâ ve yahtâr mutasarrıf olsun dediklerinde mezbûr Osman Beşe dahi vekîli mezbûr Hasan Çelebi’yi ve mezbûr Kirkor’u vicâhen ve şifâhen tasdîk eylemekle mâ-vaka‘a bi’t-taleb ketb olundu. Fî 9 Zilka‘deti’ş-şerîfe sene [1]123 Şuhûdü’l-hâl: el-Hâc Ali b. Mehmed, Ömer Çelebi b. Halil, Ali Beşe b. Ramazan, Mustafa Çelebi b. el-Hâc Ömer, el-Hâc Mehmed b. Yakub, Müezzin İbrahim Çelebi, Mehmed Beşe b. Ahmed, Mehmed Beşe b. Hasan ve gayruhum.