Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 213 Hüküm no: 326 Orijinal metin no: [57b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun'un Ali Beşe'yi boşadığı Medîne-i Üsküdar muzâfâtından Adalar nâhiyesine tâbi‘ Kartal nâm karyede sâkine Saliha bt. Süleyman nâm hatun meclis-i şer‘-i şerîfde zevci Ali Beşe b. Ma‘den nâm kimesne tarafından husûs-ı âti’l-beyânda vekîl olduğu sâbit olan işbu bâ‘isü’l-kitâb Himmet Ağa b. Mehmed mahzarında bi’t-tav‘ ikrâr-ı tâm ve takrîr-i kelâm edip zevcim mezbûr Ali Beşe ile zimmetinde mütekarrer ve ma‘kūdün-aleyh olan fiddî râyic fi’l-vakt bin beş yüz akçe mehr-i müeccelim ve nafaka-i iddetim ve me'ûnet-i süknâm ve on bir guruş on beş para hakkımdan on guruş ve bir döşek ve bir minder ve bir mak‘ad ve bir yüz yasdığı ve bir orta kaliçesi ve iki yan kaliçesi ve üç yorgan ve bir çârşeb ve bir beyaz velençe ve üç balta ve bir zıbın ve bir aba ve bir sacayağı ve ev içinde olan hırdavat üzerine muhâla‘a-i sahîha ile muhâla‘a edip ibtidâ-i zevciyetden târîh-i kitâba gelince zevciyete müte‘allika cemî‘ de‘âvîden ve mutâlebât ve muhâsamâtdan ve deyn-i mezbûr on bir guruş on beş paradan birbirimizde hak ve alâkamız kalmadı dedikde vekîl-i mezbûr Himmet Ağa dahi mukırra-i mezbûrenin ikrâr-ı meşrûhasını vicâhen ve şifâhen tasdîk etmeğin mâ-vaka‘a ketb olundu. Fî 7 Zilka‘de sene [1]123 Şuhûdü’l-hâl: Ali Çavuş b. Abdulkadir Efendi, el-Hâc Mehmed b. Yakub, el-Hâc Mehmed b. Halil, Çavuşzâde Mustafa, İbrahim Çelebi b. Mehmed, Hasan b. Ma‘den, Mehmed b. Ahmed.