Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 242 Hüküm no: 375 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin'in katilleri Halil ve Abdi'nin muhakeme edilerek haklarında gereğinin yapılması Kıdvetü’n-nüvvâb ve’l-müteşerri‘în Adalar nâibi efendi -zîde ilmuhû- ve kıdvetü’l-emâsil ve’l-akrân yeniçeri serdârı -zîde kadruhû- inhâ olunur ki, Hasan nâm kimesne ile ve (°) ve (°) nâm sagīrlerin cânib-i şer‘îden mansûb vasîleri Halil nâm kimesne Dîvân-ı hümâyûna arzuhâl edip mezbûr Hasan’ın oğlu ve eytâm-ı sıgārın babaları Hüseyin nâm kimesneyi nâhiye-i mezbûra tâbi‘ Pendik nâm karye sâkinlerinden Halil ve Abdi nâm şakīler bin yüz yirmi senesinde bi-gayri hakkın katl etmeleriyle mezkûrlar ahzolunduklarında nâhiye-i mezbûra tâbi‘ Dolayoba nâm karye sâkinlerinden mezkûr Halil’in eniştesi Ali ve şerîki Ahmed ve mezkûr Abdi’nin babası Hüseyin ve karındaşı Ömer nefislerine kefîl olmalarıyla kefâletlerine binâen mezkûr ihzâr-ı şer‘ ve icrâ-yı hak etdirilmek istediklerinde kātilleri ihtifâ ve askerîlik iddi‘âsında olmalarıyla vermeyip ziyâde gadr ve ta‘addî eylediklerin bildirip şer‘le görülüp icrâ-yı hak ve i‘lâm olunmak bâbında emr-i şerîf sâdır olmağın mûcebince işbu mektûb tahrîr ve kıdvetü’l-emâsil ve’l-akrân gediklilerden Mustafa Ağa -zîde kadruhû- mübâşir ta‘yîn ve irsâl olunmuşdur. Vusûlünde gerekdir ki, arz olunduğu üzere ise ol bâbda muktezâ-yı şer‘ üzere amel edip dahi ba‘de’s-sübût icrâ-yı hak ve vâki‘ hâli Âsitâne-i sa‘âdete arz ve i‘lâm edip mûceb-i emr-i celîlü’ş-şân ile âmil olasız ve’s-selâm. Tahrîren fî-evâili Rebî‘ülevvel sene [1]129 El-Fakīr el-Hâc Hasan, Yeniçeriyân-ı Dergâh-ı âlî hâlâ. Vasale ileynâ fî 12 Rebî‘ülevvel sene [1]129