Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 243 Hüküm no: 376 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Angeli'den miras kalan bahçeli evi mirasçılardan Hristaline ve İlyasko'nun tasarruf ettikleri Medîne-i Üsküdar’a muzâfe adalar nâhiyesine tâbi‘ Heybeliadası nâm karye sâkinlerinden iken bundan akdem hâlik olan Angeli v. Yorgo nâm zimmînin verâseti sulbiye kebîre kızları Arhondapola ve Hristaline’ye münhasır olup kable’l-kısmet mezbûre Arhondapola dahi hâlike olup verâseti ancak sadr-ı kebîr oğlu İlyasko v. Kostantin nâm zimmîye münhasır olduğu şer‘an zâhir ve nümâyân oldukdan sonra mezbûre Hristaline meclis-i şer‘-i şerîf-i enverde işbu bâ‘isü’s-sifr merkūm İlyasko muvâcehesinde bi-tav‘ihâ ikrâr ve takrîr-i kelâm edip babam hâlik-i mezbûrun ile’l-helâk mülkü olup ba‘de’l-helâk bana isâbet ve intikāl eden karye-i mezbûrede vâki‘ etrâf-ı erba‘ası Yorgo ve İlyasko mülkleri ve sâhil-i bahr ile mahdûd iki bâb fevkānî oda ve bir matbah ve tahtında bir bâb dükkânı ve üç mahzeni ve bir ekmek fırını ve iki bi'r-i mâyı ve ahâlî-i karye müşterek bir bi'r-i mâyı ve eşcâr-ı müsmire ve gayr-ı müsmireyi hâvî bağçeyi müştemil bir kıt‘a menzil mesfûr İlyasko ile ale’l-iştirâki’s-seviyy mülk-i mevrûsumuz ve hakk-ı sırfımızdır dedikde, gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-Saferi’l-hayr li-sene tis‘a ve ışrîn ve mi'e ve elf. Şuhûdü’l-hâl: İbrahim Efendi b. Mehmed, İsmail Çelebi b. Şahin, Berber Hasan Çelebi b. Mustafa, Ali Beşe b. Hüseyin, Uzguri v. Karakil, Dimitri Reis v. Yanaki, Moskora v. Yamatari, Yorgo v. Todoş, Hristo v. Yamandi, Hürmüz v. Kostantin, Nikola v. Kostantin, Asaki v. Aleksa, Pendali v. Todoş, Yasef v. Zakiri.