Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 246 Hüküm no: 381 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal'daki Rum kilisesinin ihtiyacı olmadığı halde tamir ettirildiği ve yeni odalar yapıldığı bildirildiğinden durumun araştırılması gerektiği Kıdvetü’n-nüvvâbi’l-müteşerri‘în Kartal nâhiyesinde nâibü’ş-şer‘ olan mevlânâ (°) -zîde ilmuhû- tevkī‘-i refî‘-i hümâyûn vâsıl olucak ma‘lûm ola ki, Kartal kasabasının Müslimîn ahâlîsi Südde-i sa‘âdetime arzuhâl edip kasabalarında olan Rum keferesinden ba‘zıları subaşıları ve ba‘zı kimesneler ile yek-dîl ve yek-cihet ve himâyeten kasaba-i mezbûrede vâki‘ kiliselerinin ta‘mîre ihtiyâcı yoğiken hilâf-ı şer‘-i şerîf ve bilâ-emr-i münîf hem ta‘mîr ve hem müceddeden iki bâb fevkānî oda ihdâs eylediklerin bildirip sen ki mevlânâ-yı mûmâ-ileyhsin husûs-ı mezbûru mübâşir ma‘rifetiyle teftîş ve tefahhus ve vukū‘u üzere ism ü resmleriyle Der-i devlet-medârıma arz ve i‘lâm olunmak bâbında emr-i şerîfim ricâ eyledikleri ecilden mübâşir ta‘yîn olunan kıdvetü’l-emâsil ve’l-akrân (°) -zîde kadruhû- ma‘rifetiyle şer‘le tefahhus ve sıhhati üzere arz ve i‘lâm eylemen emrim olmuşdur, buyurdum ki, (°) vusûl buldukda bu bâbda sâdır olan emrim üzere amel dahi sen ki mevlânâ-yı mûmâ-ileyhsin, mübâşir-i merkūm ma‘rifetiyle husûs-ı mezbûru şer‘le tefahhus ve sıhhati üzere Der-i devlet-medârıma arz ve i‘lâm eyleyip mazmûn-ı emr-i şerîfimle âmil olasın, şöyle bilesin, alâmet-i şerîfe i‘timâd kılasın. Tahrîren fî-evâsıtı Saferi’l-hayr sene ihdâ ve erba‘în ve mi'e ve elf. Kostantıniyye el-mahrûse. Kad vasale ileynâ fî 20 Şerî‘at-meâb Kartal nâibi efendi -zîde ilmuhû- ba‘de’s-selâm inhâ olunur ki, Kartal kasabasında olan Rum keferesinden ba‘zıları kasaba-i mezbûrede vâki‘ kiliselerinin ta‘mîre ihtiyâcı yoğiken hilâf-ı şer‘-i şerîf ve bilâ-emr-i münîf hem ta‘mîr ve hem müceddeden iki fevkānî oda ihdâs eyledikleri ihbâr olunmağla mübâşir ta‘yîn olunan kıdvetü’l-emâsil ve’l-akrân (°) ma‘rifetiyle şer‘le tefahhus ve sıhhati üzere arz olunmuşdur, inşâallâhu te‘âlâ vusûlünde mûceb-i emr-i âlî üzere amel ve hareket eyleyesin ve’s-selâm. İbrahim b. Mustafa Paşa?