Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 246 Hüküm no: 380 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zakiri'yi öldürmekle suçlanan Yanaki'nin Divan-ı hümayunda davasının görülmesi Kıdvetü’n-nüvvâbi’l-müteşerri‘în Adalar nâhiyesinde nâibü’ş-şer‘ olan mevlânâ (°) -zîde ilmuhû- tevkī‘-i refî‘-i hümâyûn vâsıl olucak ma‘lûm ola ki, Yanaki nâm zimmî südde-i sa‘âdetime arzuhâl gönderip mesfûr nâhiye-i mezbûreye tâbi‘ Tuzla nâm karyede Zakiri nâm zimmînin Katmuroğlu diğer Zakiri ve Paksaoğlu (°) nâm zimmîler ekl-i şurb ederler iken mesfûr Zakiri mürd olmağla bunun üzerine şühûd-ı udûl ile şer‘an bir nesne sâbit ve zâhir olmuş değil iken bunun için kātilsin deyü ahz ve nâhiye-i mezbûre subaşısı habsine verilip hilâf-ı şer‘ ta‘addî olunduğun bildirip ol bâbda emr-i şerîfim ricâ etmeğin kıdvetü’l-emâsil ve’l-akrân dergâh-ı mu‘allâm çavuşlarından Mustafa Çavuş -zîde kadruhû- ma‘rifetiyle Dîvân-ı hümâyûnumda mürâfa‘a-i şer‘ için mahbûsen Âsitâne-i sa‘âdetime ihzâr olunmak emrim olmuşdur, buyurdum ki, (°) hükm-i şerîfimle vusûl buldukda bu bâbda sâdır olan emrim üzere amel edip dahi mesfûru çavuş-ı merkūm ma‘rifetiyle Dîvân-ı hümâyûnumda mürâfa‘a-i şer‘ için mahbûsen Âsitâne-i sa‘âdetime ihzâr eyleyip emr-i şerîfimin mazmûn-ı münîfi ile âmil olasın, şöyle bilesin, alâmet-i şerîfe i‘timâd kılasız. Tahrîren fî-evâhiri Safer sene tis‘a ve ışrîn ve mi'e ve elf. Kostantıniyye el-mahrûse. Vasale ileynâ fî 26