Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 248 Hüküm no: 383 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Orhan Gazi Evkafı'nın Kartal'daki mukataaları iltizamının Mustafa Ağa ve Mehmed Bey'e verildiği Vech-i tahrîr-i hurûf budur ki, Gekbüze’de vâki‘ merhûm ve mağfûrün-leh Sultan Orhan Gāzî’nin -nevverallâhu mesvâhu- câmi‘-i şerîflerinin evkāfından olup vilâyet-i Anadolu’da Üsküdar kazâsında vâki‘ Kartal ve tevâbi‘ihâ mukāta‘ası mâl-ı cizyesinden mâ‘adâ sene-i sâbık üzere işbu dârende-i derûn kıdvetü’l-emâsil ve’l-akrân es-Seyyid Mustafa Ağa ve Mehmed Bey -zîde kadruhâ- tâlib, bin iki yüz doksan guruşa râgıb olup işbu bin yüz yirmi dokuz senesi Martı ibtidâsından bir sene tamâmına dek zabt u rabt etmek üzere mûmâ-ileyhâ deruhde ve iltizâm ol dahi iltizâmı kabûl eylemekle üzerine deruhde olunmuşdur ve mukāta‘a-i mezbûr sâir evkāf-ı selâtîn-i i‘zâm vüzerâ-yı kirâm gibi mefrûzü’l-kalem ve maktû‘ü’l-kadem serbest olmak üzere zabt u rabt eylemek üzere tevliyetim hasebiyle işbu temessük ketb ü terkīm olunup mûmâ-ileyhin [yedine] verildi, gerekdir ki, mûmâ-ileyh varıp mukāta‘a-i mezbûrda vâki‘ olan a‘şâr-ı şer‘iye ve rüsûm-ı örfiye ve cürm-i cinâyet ve kul ve câriye müjdegānesin ve yava ve kaçgun ve resm-i arûsâne ve bâgāt ve hadravât ve tapu-yı zemîn ve ispençe ve bennâk ve beytülmâl-i âmme ve hâssa ve sâir hukūk ve rüsûmîn cüz'î ve küllî her ne ise sene-i sâbıklarda olanlar ne gûne zabt ve ne minvâl üzere ele geldiler ise ol minvâl-i meşrûh üzere bi’l-cümle vakf-ı şerîf için ahz u kabz eyleye ve on bin akçeden ziyâde vâki‘ olur ise taraf-ı vakıfdan ahz u kabz oluna ve el-iyâzen billâhi te‘âlâ zarâr eder ise min-ba‘d zarâr iddi‘âsı eylemeyip verdiği akçeyi dahi vakf-ı şerîfe teberru‘ etmek kavliyle işbu temessük yedine verilmişdir ve sizler ki re‘âyâ-yı vakıfsız, mûmâ-ileyhi üzerinize zâbit bilip şer‘-i şerîfe ve kānûn-ı münîfe mutâbık ve muvâfık sözünden hâric vaz‘ [u] hareket etmeyip bu minvâl üzere zabt u rabt edip âhardan bir ferd dahl ü ta‘arruz eylemeye. Tahrîren fî 15 sene 1125 Hâlisü’l-fuâd el-Hâc Abdullah mütevellî hâlâ. Kad vasale ileynâ fî-gurreti Rebî‘ülâhir.