Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 248 Hüküm no: 384 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri ocaklarındaki kayıtların gözden geçirilerek sefere hazır hale getirilmesi Yâ Fettâh Mefâhirü’l-kuzât ve’l-hükkâm ma‘âdinü’l-fezâil ve’l-kelâm İznikmid kādısı ve Mihaliç ve Yalakâbad ve Mudanya ve Gemlik ve Adalar ve Karamürsel ve (°) ve (°) kazâları nâibleri -zîde fazluhum- ve mefâhirü’l-emâsil ve’l-akrân yeniçeri serdârları -zîde kadruhum- tevkī‘-i refî‘-i hümâyûn vâsıl olucak ma‘lûm ola ki, işbu sene-i mübârekede musammem olan sefer-i hümâyûn-ı nusret-makrûn için tevkīr-i cüyûş-ı muvahhidîn ve teksîr-i hurûş-ı murâbitîn için Âsitâne-i sa‘âdetden tashîh ve be-dergâh fermân olunan yeniçeri neferâtının bir gün ve bir sâ‘at mukaddem tekmîl ve tetmîm ve kıdvetü’l-emâcid ve’l-a‘yân hâlâ zağarcıbaşı olan Musa -zîde mecdühû- ile sefer-i hümâyûna memûr bütün ve yarım ortaların atîk neferâtlarından mâ‘adâ yarar ve tuvânâ cenk ve harbe kādir mukīm ve müsâfir esâmesi çalık ve kuloğullarından tammü’s-silah yiğitlerden ber-vech-i müsâra‘at tashîh ve be-dergâh ve odalarına teslîm edip ordu-yı hümâyûna dahi mâh-ı Rebî‘ülâhirin evâilinde taşra çıkmaklığa tasmîm olunduğundan zikr olunan ortalar dahi tekmîlen bir gün evvel ihtimâm olunup ve işbu mâh-ı Rebî‘ülâhirin on beşinci gününde mûmâ-ileyh ile Âsitâne’den ihrâc ve Edirne sahrâsında Ordu-yı hümâyûna mülâkī olmaları bâbında düstûr-ı mükerrem müşîr-i müfahham nizâmü’l-âlem bi’l-fi‘il dergâh-ı mu‘allâm yeniçerileri ağası vezîrim Hüseyin Paşa -edâmallâhu te‘âlâ iclâlehû- tarafından sâdır olan emr-i âlî mûcebince müekked ve müşedded mektûb gönderilmekle kıdvetü’l-emâsil ve’l-akrân (°) -zîde kadruhû- irsâl olunmağın siz ki mevlânâ-yı mûmâ-ileyhim ve serdârlarsız, bir gün evvel ve bir sâ‘at tehîr ve tevakkuf ve sâir senelere kıyâs ile meks ü ârâm eylemeyip taht-ı kazâ ve kasabât ve kurâlarınızda mukīm ve müsâfir ve sahîhü’l-esâmî ve esâmîsi çalık ve kuloğullarından yarar ve tuvânâ ve cenk ü harbe kādir ve tammü’s-silah yiğitlerden nefs-i vâhid geri kalmayıp her birleriniz bayraklarınız açıp bir gün ve bir sâ‘at mukaddem Âsitâne’ye gelip bayraklarınız altında olan neferâtı bu tarafda olan ortalara tashîh ve be-dergâh etdirdip ortalara teslîm ve sizler dahi mûmâ-ileyh ile ma‘an livâ-i fahr-i kâinât ve sürûr-ı mevcûdât ve şefî‘-i urusât habîb-i Hüdâ Muhammedü’l-Mustafa’ya -sallallâhu aleyhi ve sellem- rûmâlde her birleriniz teşmîr-i dâmen-i ihtimâm eyleyesiz. Yâ eyyühe’n-nebiyyü câhidü’l-küffâr nass-ı kerîme imtisâlen asâkir-i nusret-meâb ile gazve-i hümâyûn mütehakkık olmağın sâir vakt ü zamâna kıyâs olunmayıp her birleriniz dâmen-i gayreti dermiyân ve bayraklarınızı açıp neferâtlarınız ile bir gün evvel Âsitâne’ye gelip edâ-i hizmet eylemede ihtimâm eyleyesiz. İyâzen billâhi te‘âlâ bu bâbda biriniz tekâsül ve tehâvünü veyâhud vaktin tahammülü vardır deyü [70b] avk [ve] tesâmühü sudûr ederse eşedd-i ukūbetle mu‘âteb ve kemâl-i mertebe hitâb ile muhâtab olup bir vechile özr ve illetiniz ısgā olunmayıp her birlerinizin gereği gibi haklarından gelinip sâire mûcib-i ibret ve sebeb-i nasîhat olacaklığınızı mukarrer bilip ona göre hareket ve bir gün evvel bayraklarınızı açıp Âsitâne’ye gelip neferâtlarınızı mevcûd ve ortalara tashîh ve be-dergâh ve kendüleriniz mûmâ-ileyh ile ma‘an savb-ı livâ-i habîbullâha rû-be-râh olmada ihtimâm eyleyesiz deyü Âsitâne-i sa‘âdetimde bi’l-fi‘il sekbânbaşı olan iftihârü’l-emâcid ve’l-ekârim el-Hâc Hasan -dâme mecdühû- tarafından mühürlü mektûb verilmekle vech-i meşrûh üzere amel olunmak bâbında fermân-ı âlîşânım sâdır olmuşdur, buyurdum ki, emr-i şerîfimle (°) vusûl buldukda sâdır olan fermân-ı celîlü’l-kadrim ve sekbânbaşı mûmâ-ileyhin mühürlü mektûbu mûcebince amel edip min-ba‘d hilâfına rızâ ve cevâz göstermeyesiz, şöyle bilesiz, alâmet-i şerîfe i‘timâd kılasız. Tahrîren fî-evâhiri Rebî‘i’l-âhir li-sene tis‘a ve ışrîn ve mi'e ve elf. <> Kostantıniyye Kad vasale ileynâ fî 7 Rebî‘ülâhir. Emr-i âlî mûcebince sekbânbaşı ağanın mektûbu vardır.