Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 251 Hüküm no: 386 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakında sefere çıkılacağından sürsat ve beldar bedeli tahsilatında gerekenin yapılması Sûret-i emr-i âlîşândır ki aynı ile aslından naklolunduğu Tıbku aslıhu’l-âlî nemekahü’l-fakīr ileyhi azze şânühû İsmail el-müvellâ-hilâfeten bi-nâhiyeti Adalar Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-mu‘în mevlânâ Üsküdar kādısı -zîdet fezâiluhû- ve mefâhirü’l-kuzât ve’l-hükkâm ma‘âdinü’l-fazl ve’l-kelâm Kocaeli sancağında vâki‘ olan kādılar -zîde fazluhum- ve mefâhirü’l-emâsil ve’l-akrân kethüdâ yerleri ve yeniçeri serdârları ve a‘yân-ı vilâyetin iş erleri -zîde kadruhum- tevkī‘-i refî‘-i hümâyûn vâsıl olucak ma‘lûm ola ki, inşâallâhu te‘âlâ evvel-bahâr-ı meymenet-âsârda musammem olan sefer-i hümâyûn-ı nusret-makrûnuma memûr Dergâh-ı mu‘allâm yeniçerileri ve cebeci ve topçu ve sipâh ve silahdâr ve dört bölük halkı ve ahâlî-i dîvân ve sâir kapım kullarının iktizâ eden zehâiri ve sâir mühimmât-ı seferim için ziyâde hazîne tedârik olunması mühim ve muktezî olmağın bu sene-i mübârekede sefer-i hümâyûnum mukarrer ve muhakkak olmağla gerek zehâir ve gerek mühimmât-ı seferiye sene-i sâbıkdan izdiyâd olmak üzere cem‘ ve ihzâr ve iddihâr olunmak lâzım gelmeğin sinîn-i sâbıkādan sefer-i hümâyûnum vukū‘unda menâzile karîb olan kazâlardan zahîre nakl ve ihrâc ve ba‘îd olan kazâlardan Üngürüs seferlerinde olduğu vech üzere zahîre bulunan mahallerden mübâya‘a ve menâzil ve merâhile ihzâr olunmak için mem[âli]k-i mahrûsemda Rumeli ve Anadolu câniblerinden acele üzere bütün sürsat bedelleri ve her bir neferden yarımşar guruş ve her bir mu‘âfân neferinden beşer bin akçe bedel-i beldârları tahsîl olunagelmekle bin yüz yirmi dokuz senesine mahsûb olmak üzere Kocaeli sancağının on yedi bin yedi yüz otuz altı guruş ve iki sülüs bedel-i sürsatları ve iki bin beş yüz yetmiş altı guruş bedel-i beldârları ve bin guruş mu‘âfân bedelleri cem‘ ve tahsîl olunmak lâzım gelmeğin mübâşirin yedine verilen mühürlü ve nişânlı mevkūfât defteri sûreti mûcebince sefer-i hümâyûnum masârıfı içün cem‘ ve tahsîl ve dâhil-i Hazîne-i âmirem etdirilip ve sürsat ve beldâr bedeli tahsîli sefer-i hümâyûnum masârıfı içün olmağın siz ki kādılar ve kethüdâ yerleri ve yeniçeri serdârları ve a‘yân-ı vilâyetsiz her biriniz gereği gibi ihtimâm edip hilâf-ı emr ve defter bir ferde ta‘allül ve nizâ‘ ve inâd ve muhâlefet etdirmeyesiz ve tahsîline memûr olan mübâşire başka ma‘âş tahsîli için re‘âyâ fukarâsına cevr ü ta‘addî eylememek üzere asıl tahsîl olan mâldan her bin guruşdan on iki buçuk guruş tahsîldâra ta‘yîn olmağın mîrîden ta‘yîn olunan ol mikdâr ma‘âş ile kanâ‘at edip re‘âyâ fukarâsından emr ve defterden ziyâde mahkeme harcı ve kâtibiye ve aklâm harcı ve sâir bahâne ile bir akçe ve bir habbe alınmaya ve aldırmayasız ve sü[r]sat teklîfi, tekâlîf-i sâire makūlesi olmayıp cümleden evvel tedârik olunması muktezî ve guzât-ı muvahhidînin rûz-ı merre verilecek ta‘yînâtlarına tedârik olunan zahîreleri için olup ve ancak sefer-i hümâyûnum vukū‘u [72a] takrîbi ile mâlen ve bedenen sıyânet ve i‘ânet için vâki‘ olmağla zümre-i sâdât-ı kirâm ve eimme ve hutebâdan mâ‘adâ mu‘âf ve gayr-ı mu‘âf ve evkāf ve havâs re‘âyâsı tekâlîf-i mezbûreye dâhil olmağla her biri beynlerinde tahammülleri üzere tevzî‘ ve bir sâ‘at mukaddem edâsına takayyüd ve ihtimâm edip hilâf-ı hareket ile bizler askerî ve tekā‘üd ve kal‘a neferâtı ve muhâfazacı ve mu‘âf ve âyende ve pandur ve geçid bekçileriyiz ve çakırcı ve şâhinci ve taycı ve küreci ve avcı ve korucu ve serbest re‘âyâsıyız deyü bir ferde muhâlefet etdirilmeye deyü fermân-ı âlîşânım sâdır olmuşdur. Buyurdum ki hükm-i şerîfimle (°) vardıkda bu bâbda vech-i meşrûh üzere şeref-yâfta-i sâdır olan emr-i celîlü’ş-şân-ı vâcibü’l-imtisâlimin mazmûnuyla âmil olup hilâfıyla vaz‘ u hareketden be-gāyet ihtirâz eyleyesiz, şöyle bilesiz, alâmet-i şerîfe i‘timâd kılasız. Tahrîren fi’l-yevmi’s-sâbi‘ aşer şehri Rebî‘i’l-evvel sene tis‘a ve ışrîn ve mi'e ve elf. Edirne el-mahrûse. Kad vasale ileynâ fî 8 Rebî‘ülâhir.