Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 250 Hüküm no: 385 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lanbornos'a ait dut ve armut ağaçlarını Fatma'nın haksız yere tasarrufunun engellenmesi Medîne-i Üsküdar’a muzâfe Adalar nâhiyesine tâbi‘ Kartal nâm karye mutavattınlarından işbu bâ‘isü’s-sifr Lanbornos v. Yani nâm zimmî meclis-i şer‘-i enverde yine karye-i mezbûre sâkinelerinden Fâtıma bt. Habib nâm hatun tarafından husûs-ı âti’z-zikre vekîl-i müsecceli olan li-ebeveyn er karındaşı İbrahim nâm kimesne mahzarında üzerine da‘vâ ve takrîr-i kelâm edip karye-i mezbûre hâricinde Abdurrahman Ağa timârı toprağında vâki‘ bâ-ma‘rifet-i sâhib-i arz zabt ve tasarrufumda olan tahdîd ve tavsîfden müstağnî bir kıt‘a bağım dâhilinde vâki‘ bir dut ve bir amrud ağaçlarımı târîh-i kitâbdan üç sene mukaddem müvekkile-i mezbûrenin zevci olup bundan akdem fevt olan Mehmed Beşe nâm kimesne bi-gayri hakkın fuzûlen zabt edip ba‘de’l-vefât müvekkile-i mezbûre Fâtıma dahi bi-gayri hakkın fuzûlen zabt etmeğin suâl olunup kasr-ı yedine tenbîh olunması matlûbumdur dedikde gıbbe’s-suâl vekîl-i mezbûr cevâbında fi’l-vâki‘ sâlifü’z-zikr dut ve amrud ağaçlarını müvekkile-i mezbûrenin zabtını ikrâr lâkin müdde‘î-i mezbûr Lanbornos’un mülkü olduğunu inkâr edicek müdde‘î-i merkūmdan ber-vech-i muharrer müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden ve karye-i mezbûre sâkinlerinden Himmet Bey b. Mehmed ve Mustafa Çelebi b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka zikr olunan bir dut ve bir amrud ağaçları müdde‘î-i mezbûrun bostanı dâhilinde mülkü iken müvekkile-i mezbûrenin zevci müteveffâ-yı mezbûr Mehmed Beşe ve müvekkile-i mezbûre Fâtıma târîh-i kitâbdan üç sene mukaddem ber-vech-i muharrer bi-gayri hakkın fuzûlen zabt etdiler, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle zikr olunan dut ve amrud ağaçlarından müvekkile-i mezbûrenin kasr-ı yedine ba‘de’t-tenbîh mâ-vaka‘a bi’t-taleb ketb olundu. Fi’l-yevmi’l-âşir min-Rebî‘i’l-evvel li-sene tis‘a ve ışrîn ve mi'e ve elf. Şuhûdü’l-hâl: Mehmed Ağa b. Mehmed, Himmet Bey b. Mehmed, Mustafa Çelebi b. Mehmed, Abdullah Beşe b. Abdurrahman, İsmail Çelebi b. Şahin ve gayruhum.