Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 254 Hüküm no: 391 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalar nahiyesi naibliği ve kısmet-i askeriyesinin Mahmud Efendi'ye verildiği Hüve’r-Rabb Yâ Allah Yâ Rezzâk Yâ Fettâh İzzet-meâb mevlânâ Mahmud Efendi kâm-yâb Ba‘de’t-tahiyyeti’l-vâfiye inhâ olunur ki, işbu bin yüz yirmi dokuz Cemâziyelûlâsı muntasıfından zabt etmek üzere taht-ı hükûmetimizde olan Üsküdar nevâhîsinden Adalar nâhiyesinin umûr-ı şer‘iyesi tarafımızdan sana sipâriş olunmuşdur. Gerekdir ki nâhiye-i mezbûra varıp beyne’l-ahâlî icrâ-yı ahkâm-ı şer‘iyede teşmîr-i sakk-ı ihtimâm edip câdde-i şer‘den inhirâf etmeyesiz. Hurrire fi’t-târîhi’l-mezbûr li-seneti’l-merkūme. Mine’l-muhlis Mehmed Selim el-kādı-i bi-Üsküdar. Umûr-ı kısmet-i askeriye dahi tarafımıza tefvîz olunmağla mevtâ-yı askeriye muhallefâtı tahrîr ve beyne’l-verese bi’l-farîzati’ş-şer‘iye tevzî‘ ve taksîm edesiz ve’s-selâm. Mutâbıkun li-aslihi’l-âlî nemekahû el-fakīr ileyhi subhânehû ve te‘âlâ Ataullah el-Kādı bi-askeri Anadolu -ufiye anhu-. Sûret-i emr-i şerîf oldur ki, aslından naklolundu.