Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 254 Hüküm no: 392 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memleketine dönecek olan Hind elçisinin Bağdat'a kadar yolda iaşesinin sağlanması Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ (°) kādısı -zîdet fezâiluhû- ve mefâhirü’l-kuzât ve’l-hükkâm ma‘denü’l-fazl ve’l-kelâm Üsküdar’dan Bağdad’a varınca yol üzerinde vâki‘ olan kazâların kādıları -zîde fazluhum- ve mefâhirü’l-emâsil ve’l-akrân mütesellimler ve voyvodalar ve kethüdâ yerleri ve yeniçeri serdârları ve kurâ zâbitleri ve sâir ve a‘yân-ı vilâyetin iş erleri -zîde kadruhum- tevkī‘-i refî‘-i hümâyûn vâsıl olucak ma‘lûm ola ki, bundan akdem rikâb-ı hümâyûnuma Hind pâdişâhı tarafından [gelen] elçi vilâyetine gitmek üzere avdet ve ınsırâfına izn-i hümâyûnum olmağla Üsküdar’dan Bağdad’a varınca nüzûl eylediği menâzilin her birinde zâd ü zahîrelerin tedâriki muktezî olmağın imdi siz ki kādılarsız, elçi-yi mûmâ-ileyh Üsküdar’dan Bağdad’a varınca yol üzerinde her kangınızın taht-ı kazâsına tâbi‘ menâzile nüzûl eyledikde lâzım gelen bahâları her kazâ ahâlîsinin tekâlîflerine takās ve mahsûb olmak üzere ve tekâlîfi olmayan kazâ ahâlîsi taraf-ı mîrîden verilmek şartıyla beher yevm yirmişer guruşluk zahîre tedârik ve tarafından kabza memûr olana teslîm ve yedinden memhûr temessük alıp her kazâ ahâlîsinin yedine verip bir dürlü özür ve bahâne ile elçi-yi mûmâ-ileyhin zâd-ı zahîreleri husûsunda kat‘â zarûret ve muzâyaka çekdirmeyesiz deyü fermân-ı âlîşânım sâdır olmuşdur, buyurdum ki, hükm-i şerîfimle Dergâh-ı mu‘allâm çavuşlarından kıdvetü’l-emâsil ve’l-akrân Yusuf Çavuş ve Halil Çavuş -zîde kadruhumâ- vardıkda bu bâbda vech-i meşrûh üzere şeref-yâfta-i sudûr olan işbu emr-i celîlü’l-kadri’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı münîfi ile âmil olup hilâfıyla vaz‘ u hareketden be-gāyet ihtirâz eyleyesiz, şöyle bilesiz, alâmet-i şerîfe i‘timâd kılasız. Tahrîren fi’l-yevmi’l-hâmis aşer şehri Rebî‘i’l-âhir sene tis‘a ve ışrîn ve mi'e ve elf. Edirne el-mahrûse. Kad vasale ileynâ fî 29 şehr-i Cumâdelûlâ sene 1129