Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 257 Hüküm no: 395 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katil, yol kesen ve hırsızlık yapanların her nerede olursa yakalanması Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisû ulûmi’l-enbiyâi ve’l-mürselîn el-muhtassûn bi-mezîdi inâyeti’l-meliki’l-mu‘în Üsküdar’dan Anadolu’nun sol kolu nihâyetine varınca vâki‘ olan mevâlî-i i‘zâm -zîdet fezâilühüm- ve mefâhirü’l-kuzât ve’l-hükkâm ma‘âdinü’l-fezâil ve’l-kelâm kādılar -zîde fazluhum- ve mefâhirü’l-emâsil ve’l-akrân mütesellimler ve kethüdâ yerleri ve yeniçeri serdârlar vekîlleri ve havâs ve evkāf zâbitleri ve a‘yân-ı vilâyetin ve iş erleri -zîde kadruhum- tevkī‘-i refî‘-i hümâyûn vâsıl olucak ma‘lûm ola ki, bundan akdem Anadolu yakasında ba‘zı kuttâ‘-ı tarîk eşkıyâsı zuhûr edip kat‘-ı tarîk ve katl-i nüfûs ve nehb ü gāret-i emvâl ile sükkân-ı vilâyet ve ebnâ-i sebîl îsâl-i mazarrat ve fesâd ve şekāvet üzere oldukları haber alındıkda ol makūle katl-i nüfûs ve nehb ü gāret-i emvâle cesâret eden kuttâ‘-ı tarîk ve sâir eşkıyâ ve haramzâde bulundukları mahallerde alâ-eyyi hâl ahz ve ele getirilip def‘-i âsâr-ı mazarlarıyla bilâd-ı ibâdın te'mîn ve tatmîn için mukaddemâ dahi tenbîh ve te'kîdi müştemil evâmir-i şerîfim şeref-yâfta-i sudûr olmuş iken tehâvün ve taksîrinizden nâşî hâlâ Anadolu yakasında vâki‘ eyâlet ve elviyede ba‘zı mahallerde kuttâ‘-ı tarîk eşkıyâsı zuhûr edip yollarda ve bellerde gezip bazı kârbânları ve ebnâ-i sebîli urup îsâl-i hesâret eyledikleri i‘lâm olunup ve bi-tevfîkihî te‘âlâ ol makūle kuttâ‘-ı tarîk ve sâir eşkıyâ ve haramzâdenin def‘-i âsâr-ı mazarratları turuk ve mesâlikin ve sükkân-ı vilâyet ve ebnâ-i sebîlin te'mîn ve tatmîni mehâmm-ı lâzımü’l-ihtimâm olmağın hâlâ sizi îkāz ve endâr için işbu emr-i şerîf-i vâcibü’l-imtisâlim ısdâr ve kıdvetü’l-emâsil ve’l-akrân Ahmed -zîde kadruhû- ile irsâl olunmuşdur. İnşâallâhu te‘âlâ her kangınızın taht-ı hükûmetine dâhil olur ise birer sûreti muhâkemede sicillâta kayd eyledikden sonra mübâşir-i mûmâ-ileyhin yedinde ibkā ve vech-i meşrûh üzere katl-i nüfûs ve nehb [ü] gāret-i emvâl ile fesâd ve şekāvet üzere olan kuttâ‘-ı tarîk ve sâir eşkıyâ ve haramzâde [75a] her kangınızın taht-ı hükûmetinde bulunursa her ne tarîkle olursa olsun, kemâl-i takayyüd ve ihtimâm ile alâ-eyyi hâl ahz ve ele getirip şer‘le haklarında lâzım gelen cezâları bilâ-tereddüd tertîb ve âsâr-ı mazarratlarından sükkân-ı vilâyet ve ebnâ-i sebîl[i] te'mîn ve tatmîne bezl-i sa‘y ve kudret eyleyesiz ve ol makūle eşkıyânın mazarratından eğer âbir ve sebîl ve eğer kātı‘-ı bilâddan bir ferd mutazarrır olmamak üzere âsâr-ı mazarrat ve fesâdların izmihlâli iktizâ-yı murâd-ı hümâyûnumdur. Şöyle ki bundan sonra her kangınızın havza-i hükûmetinde sükkân-ı vilâyet ve ebnâ-i sebîlden bir ferdin emvâl ve erzâkı nehb ü gāret olunmak ihtimâli olur ise gāret olunan eşyâ sizden tazmîn olunduğundan mâ‘adâ her biriniz ukūbet-i şedîde ile muâhaze ve mu‘âteb olacağınız mukarrer bilip eşkıyâ def‘inde ona göre cidd-i tâm ve takayyüd-i ihtimâm eyleyesiz. Ammâ bu husûsu ahz ve celb-i mâla vesîle edip veyâhud kendü hallerinde kalıp ve fesâd ve şekāvetde alâkaları olmayanların nüfûs ve emvâllerine hilâf-ı şer‘-i şerîf ta‘arruz ve ta‘addîden be-gāyet ihzâr ve ictinâb etmeniz bâbında fermân-ı âlîşânım sâdır olmuşdur. Buyurdum ki (°) vusûl buldukda bu bâbda vech-i meşrûh üzere şeref-yâfta-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla âmil olup hilâfından be-gāyet ihzâr ve ictinâb eyleyesiz, şöyle bilesiz alâmet-i şerîfe i‘timâd kılasız. Tahrîren fî-evâhiri Cumâdelûlâ li-sene tis‘a ve ışrîn ve mi'e ve elf. Sahrâ-yı Edirne. Mûcebince sadr-ı âlî hazretlerinin dahi mektûb-ı şerîfleri vardır.