Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 256 Hüküm no: 394 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denize indirilecek olan kalyonların ihtiyaçları için Kartal ve Pendik'ten gemicilik işinden anlayan on neferin Tersane-i âmire'ye gönderilmesi Kıdvetü’n-nüvvâbi’l-müteşerri‘în Kartal ve Pendik kazâsında nâibü’ş-şer‘ olan mevlânâ (°) -zîde ilmuhû- tevkī‘-i refî‘-i hümâyûn vâsıl olucak ma‘lûm ola ki, inşâallâhu te‘âlâ işbu sene-i mübârekede rûy-ı deryâya pâd-bân-güşâ-yı azîmet edecek Donanma-yı hümâyûnum kalyonları ile ma‘an mühimmât-ı cebehâne ve tophâne ve zehâir tahmîl olunmak üzere donandırılması fermânım olan tüccâr kalyonları için ziyâde üstâd ve marinar gemicilerinin tedâriki mühim ve muktezî olduğun hâlâ kapudanım olan emîrü’l-ümerâi’l-kirâm Mehmed -dâme ikbâluhû- i‘lâm ve sene-i sâbık üzere ba‘zı kazâlardan üstâd ve marinar gemicileri olmak üzere ihrâcı lâzım gelmeğin imdi sen ki nâib-i mûmâ-ileyh ve sâir iş erlerisiz, Kartal ve Pendik kazâsından ma‘rifetiniz ile tenzîl olunandan mâ‘adâ on nefer marinar neferâtını işe yarar ve gemicilik ahvâlinden mahâret-i kâmilesi zâhir ve ma‘lûm ve bahrî kimesnelerden olmak üzere mu‘accelen ihrâc ve irsâl ve gelip kalyonlara dâhil olduklarında ber-vech-i mu‘tâd ayda beşer guruş süvâr oldukları kalyon kapudanı yedinden verilmek üzere Tersâne-i âmire’me irsâl ve îsâl ve teslîm etdirdip hizmet-i lâzımede mevcûd ve istihdâm etdirmekde dikkat-i sa‘y ve ihtimâm edip emr-i hümâyûnuma özür ve cevâba sâlik olmakdan ve bir tarafıyla avk u tehîrden ve ihmâl ü müsâmahadan be-gāyet ihtirâz eylemeniz bâbında fermân-ı âlîşânım sâdır olmuşdur, buyurdum ki hükm-i şerîfimle (°) vardıkda bu bâbda vech-i meşrûh üzere şeref-yâfta-i sudûr olan fermân-ı celîlü’ş-şânımın mazmûn-ı münîfi ve itâ‘at-makrûnuyla âmil olup hilâfı vaz‘ u hareketden be-gāyet [ihtirâz] eyleyesiz, şöyle bilesiz, alâmet-i şerîfe i‘timâd kılasız. Tahrîren fi’l-yevmi’r-râbi‘ şehri Rebî‘i’l-evvel sene tis‘a ve ışrîn ve mi'e ve elf. Edirne el-mahrûse. Kad vasale ileynâ fî 4 şehri Cemâziyelâhire sene 1129 Mûcebince Kapudan İbrahim Paşa’nın buyuruldusu vardır ve Emin Efendi’nin mektûbu dahi vardır.