Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 258 Hüküm no: 397 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakında sefere çıkılacağından asker kaçakları için gerekli önlemlerin alınması Şerî‘at-şi‘âr Üsküdar’dan İznikmid’e varınca yol üzerinde ve yemîn ü yesârda vâki‘ olan hâkimü’ş-şer‘ efendiler hazretlerine ve kıdvetü’l-emâsil ve’l-akrân yeniçeri serdârı vekîlleri ve a‘yân-ı vilâyetin iş erleri -zîde kadruhum- ba‘de’t-tahiyye ve’t-teslîm inhâ olunur ki, bâ‘is-i mektûb sa‘âdetlü mehâbetlü pâdişâh-ı İslâm -halledallâhu te‘âlâ ilâ-yevmi’l-kıyâm- hazretlerinin yümn ve ikbâl ile sefer-i nusret-esere azîmet-i hümâyûnları karîb olup askerî tâifesinden ba‘zıları oldukları mahâllinden kalkıp ayak sürerek zikr olunan kazâlarda ba‘zı zî kudret kimesneler çiftliklerinde ve ba‘zı kurâlarda vakit mürûr etmek için ihtifâ ve ol vechile askerin kılletine bâ‘is olmağın tecessüs olunup tâife-i askeriyeden bulunanları oldukları mahâlden bi-eyyi hâl kaldırıp memûr oldukları sefer-i hümâyûnda bulunmalarına kemâl mertebe mukayyed ve nefs-i vâhide aslâ kimesne sâhib çıkdırmamak üzere minvâl meşrûh üzere tarafımıza hitâben bâ-fermân-ı celîlü’ş-şân şeref-yâfta-i sudûr buyurulmağın mûcebince mektûb ve hâssa çiftliklerinden dört aded haseki ta‘yîn ve irsâl olunmuşdur. Vardıkda sâdır olan emr-i âlînin mazmûn-ı itâ‘at-makrûnuyla amel ve mûceb-i mektûb ile âmil olasız. Mustafa, Ser-sekbân-ı Hâssa.