Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 259 Hüküm no: 398 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakında sefere çıkılacağından askerlik görevi olanların geride kimseyi bırakmadan toplanıp görev yerlerine ulaştırılması Şerî‘at-şi‘âr fezâil-disâr Adalar ve Gekbüze ve İznikmid ve Karamürsel ve Yalakâbad ve Pazarköyü ve Gemlik ve Mudanya ve Mihaliç ve Manyas ve Edincik ve Bandırma kazâ ve nevâhîlerinde kuzât ve nüvvâb efendiler -zîde fazluhum- dürer-i tahiyyât iblâğından sonra kıdvetü’l-emâcid ve’l-a‘yân sâbık İstanbul ağası olup hâlâ İznikmid ağası olan Mustafa Ağa -zîde mecdühû- ve zikr olunan kuzât ve nevâhîlerde vâki‘ yeniçeri zâbitleri ve ocak ihtiyârları ve a‘yân-ı vilâyetin iş erleri -zîde kadruhum- inhâ olunur ki işbu sene-i mübârekede mütevekkilen alellâhu te‘âlâ mütehakkık olan sefer-i hümâyûn-ı meymenet-makrûna bi-nefsihî şevketlü mehâbetlü azametlü pâdişâh-ı âlem-penâh -eyyedallâhu saltanatuhû ve ebkāhu- efendimiz hazretlerinin hareket-i hümâyûnları mukarrer olup ve işbu sâl-i zafer-iştimâlde vâki‘ sefer-i hümâyûna memûr olan tavâif-i askeriyeden niceleri illet ü bahâne ve a‘yân-ı vilâyetin himâyet ü sıyânetleriyle taht-ı kazâ ve kasabât ve kurâlarınızda ve çiftliklerde tebdîl-i câme ve ihtifâ ve ba‘zıları dahi teennî ile gideriz vaktin tahammülü vardır deyü avk u tehîr ve niceleri dahi yemîn [ü] yesâr ve orta kola ta‘yîn sürücü ağalar vardıkda gaybet ve sa‘b-ı mahallere tahsîn edip mûmâ-ileyhim mezbûrûndan sonra evlerine ve yurtlarına inip kisb ü kâr ile ve şikâr ve her biri askerîlik iddi‘â edip memûr oldukları sefer-i hümâyûndan geri kaldıkları sem‘-i hümâyûn-ı şehinşâhiye ilkā olmağın taraf-ı saltanat-ı aliyyeden müekked ve müşedded emr-i âlî sâdır olmağın işbu mektûb tahrîr ve kıdvetü’l-emâcid ve’l-a‘yân sâbıkā orta çavuş Abdullah Ağa -zîde mecdühû- mübâşir ta‘yîn ve irsâl olunmuşdur. Vusûlünde gerekdir ki vech-i meşrûh üzere tavâif-i askeriyeden olup işbu sene-i mübârekede sefer-i hümâyûndan geri kalıp taht-ı kazâ ve kasabât ve kurâ ve çiftliklerde ve a‘yân-ı vilâyetin himâyet ve sıyânetlerde tebdîl-i câme ve ihtifâ edenleri ve vaktin tahammülü vardır deyü ayak sürüyüp ta‘allül eder askerî tâifelerinden ve kul oğlanlarından nefs-i vâhid geri kalmayıp evlerinden ve yurtlarından ve ihtifâ eyledikleri mahallerden ihrâc ve sefer-i hümâyûna tesyîr etdirdip ferd-i vâhidin meks ve tehîrine ruhsat ve cevâz gösterildiği bu def‘a dahi istimâ‘ olunur ise iyâzen billâhi te‘âlâ her birleriniz eşedd-i ukūbet ile mu‘âkab ve sâir senelere kıyâs ile tekâsülünüz hasebiyle müekked ve müşedded haklarınızdan gelineceğin mukarrer bilip ona göre basîret ve intibâh üzere hareket edip zikr olunan askerî tâifelerini bir gün mukaddem evlerinden ihrâc ve asker-i İslâm’a erişdirmeye dikkat-i tâm eyleyesiz, husûs-ı mezkûr için inâd ve muhâlefet edenlerin ism ü resmleriyle her birleriniz arz ü i‘lâm eyleyesiz, gereği gibi sâire mûcib-i ibret ve sebeb-i nasîhat için haklarından ve sen ki mübâşir-i merkūmsun -zîde kadruhû- varıp dâhil olduğun kazâ ve kasabât ve kurâların mecma‘-ı nâs olan mahallerinde vech-i meşrûh üzere münâdîler nidâ etdirdip gereği gibi tenbîh ve te'kîd ve hilâfıyla hareketden her birleri mu‘âkab olunacaklarından âgâh edip hilâf-ı rızâ-yı hümâyûn tama‘-ı hâmın sebebiyle nefs-i vâhidin geri kalmasına müsâmaha ve tekâsülün istimâ‘ olunur ise senin dahi hakkından gelineceğin mukarrer bilip ona göre cümleye âyan ve işâ‘at edip itmâm-ı hizmet ile ric‘at ve mûcib-i mektûb ile âmil olasız. Tahrîren fî-evâsıtı şehri Receb sene tis‘a ve ışrîn ve mi'e ve elf. Hacı Hasan Ser-sekbân hâlâ. Kad vasale ileynâ fî 21