Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 600 Hüküm no: 741 Orijinal metin no: [131b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Efendi b. Nasuh’un menzilini borçlarına karşılık takas etmesi Mahmiye-i İstanbul’da Esirci Kemal mahallesinde sâkin imâm Ahmed Efendi b. Nasuh meclis-i şer‘-i şerîf-i enverde mahmiye-i mezbûrede Muhsine Hâtun mahallesinde sâkin kendi tarafından asîl ve dâmâdı Ali Efendi b. Sâlih tarafından ikrâr-ı câ’i’z-zikri tasdîke vekîl-i müsecceli olan işbu bâ‘isü’l-kitâbü’l-müstetâb el-Hâc Hamza Çelebi b. Mehmed mahzarında ikrâr-ı tâm ve takrîr-i kelâm edip akd-i âti’l-beyânın sudûruna değin yedimde mülk ve hakkım olup mârrü’z-zikr Esirci Kemal mahallesinde vâki‘ bir tarafdan ba‘zan Hammâmîzâde Mehmed Çelebi mülkü ve ba‘zan Seyyid Çelebi mülkü ve ba‘zan çukacı Mehmed Çelebi veresesi mülkü ve bir tarafdan ba‘zan Mûytâb Ali Çelebi mülkü ve ba‘zan Mûytâb Mahmud Çelebi mülkü ve bir tarafdan mukaddemâ Abdullah Ağa’ya bey‘ eylediğim mülk hamam ve bir tarafdan tarîk-i âmla mahdûd fevkānî yedi bâb oda ve bir sofa ve vustâda dört bâb oda ve tahtında bir ahır ve bir matbah ve kenîf ve muhavvatayı müştemil olup müvekkil-i merkūm Ali Efendi’ye cihet-i deyn-i şer‘îden ba‘de küllî hesâb zimmetimde vâcibü’l-edâ deynim olan bin yüz elli guruş mukābelesinde merhûn olan mülk menzilimi ba‘de’l-fek bi cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i kat‘î ile merkūmân Ali Efendi ve el-Hâc Hamza Çelebi’ye bin dokuz yüz elli esedî guruşa bey‘ ve temlîk ve teslîm mezbûrân dahi ber vech-i muharrer iştirâk-i seviy üzre iştirâ ve temlîk [ve] kabûl ettiklerinden sonra semeni olan meblağ-ı mezbûr bin dokuz yüz elli guruşun bin yüz elli guruşunu ve ber vech-i mübeyyen müvekkil-i merkūm Ali Efendi’ye deynim olan meblağ-ı mezkûr bin yüz elli guruşa takās, ol dahi mukāssa ve kabûl edip ve bâkī kalan sekiz yüz guruşu işbu meclis-i şer‘de merkūm el-Hâc Hamza Çelebi yedinden tamâmen ahz u kabz eyledim ba‘de’l-yevm menzil-i mahdûd-ı mezkûr cümle-i tevâbi‘iyle müşteriyân-ı merkūmân Ali Efendi ve el-Hâc Hamza’nın iştirâken mülk-i müşterâları ve hakk-ı sırfları olmuşdur benim min ba‘d menzil-i mezbûrda bir vechile alâka ve medhalim kalmamışdır keyfe mâ yeşâ ve yahtârân mutasarrıfân olsunlar dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Fahrü’l-müderrisîn Mahmud Efendi b. Zülfikār, Mehmed Efendi b. Sefer el-İmâm, Abdullah Efendi b. Mehmed el-İmâm, Şeyh Ali Efendi Hatîb-i Sinan Paşa.