Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 600 Hüküm no: 740 Orijinal metin no: [131a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İnâyet bt. Abdullah’ın Muammer bt. Abdullah’ı azat etmesi Mahmiye-i İstanbul’da Üskübî mahallesinde sâkine olup zâtı ma‘rifet-i şer‘iyye ile ârifân el-Hâc Mustafa b. Musa ve el-Hâc Yusuf b. Abdullah nâm kimesneler ta‘rîfleriyle mu‘arrefe olan İnâyet bt. Abdullah nâm hâtun meclis-i şer‘-i şerîf-i enverde ikrâr ve takrîr-i kelâm edip bana rıkkını mu‘terife olan işbu orta boylu açık kaşlı sarı ala gözlü Eflakiyyetü’l-asl bâ‘isetü hâze’l-kitâb Muammer bt. Abdullah nâm câriye-i memlûkemi, hasbeten lillâh malımdan tahrîr ve i‘tâk ve zümre-i harâir-i asliyyâta idrâc ve ilhâk eyledim ba‘de’l-yevm mevsûfe-i merkūme sâir harâir-i asliyyât gibi hürre olup üzerinde velâ-i şer‘îden gayrı hakkım kalmadığından sonra eşyâ-i memlûkemden bir minder ve bir kilim ve bir yastık ve bir sahan ve bir tencere ve bir yan keçemi mezbûre Muammer’e hibe ve teslîm ol dahi meclis-i hibede ittihâb ve kabz ve tesellüm eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min Şevvâli’l-mükerrem li sene seb‘a ve tis‘în ve elf. Şuhûdü’l-hâl: El-Hâc Mustafa b. Musa, el-Hâc Yusuf b. Abdullah, Mehmed Efendi b. Mehmed, İbrahim Çelebi b. Ahmed, Mustafa Kethüdâ-yı muhzırân, Ebûbekir Efendi b. Abdi, es-Seyyid Muharrem Efendi b. İsmail ve gayruhüm.