Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 262 Hüküm no: 404 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe'nin evini Behliz Mehmed'e sattığı Medîne-i Üsküdar muzâfâtından Adalar nâhiyesine tâbi‘ Soğanlık nâm karye sükkânından Hasan Beşe b. İsmail nâm kimesne meclis-i şer‘-i hatîr-i lâzımü’t-tevkīrde işbu râfi‘u’l-kitâb Behliz Mehmed b. Abdullah mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan Şeyh Mustafa Efendi mülkü ve bir tarafdan Hüseyin Bey ve bir tarafdan Mehmed Beşe mülkü ve bir tarafdan tarîk-i âm ile mahdûd fevkānî iki bâb oda ve bir sofa ve tahtında bir ahır ve kenîfi müştemil mülk menzilimi târîh-i kitâbdan bir sene mukaddem bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î mezbûr Behliz Mehmed’e seksen guruşa bey‘ ü temlîk ve teslîm eyledikde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr seksen guruşu mezbûr Behliz Mehmed yedinden bi’t-tamâm ahz u kabz eyledim, ba‘de’l-yevm menzil-i mahdûd-ı mezkûr, merkūm Behliz Mehmed’in mülk-i müşterâsı ve hakk-ı sırfı olup benim kat‘â alâka ve medhalim kalmamışdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Şevvâli’l-mükerrem li-sene tis‘a ve ışrîn ve mi'e ve elf. Şuhûdü’l-hâl: Mehmed Efendi b. Mustafa, Halil Beşe b. Abdullah, Ahmed Beşe b. Mehmed, Mehmed b. Mehmed, el-Hâc Mesud b. el-Hâc Ali.